Print this page

“Adeus Hanjam, Bem Vindo Rui Gomes”

By November 23, 2020 2729

Tempotimor (Dili)- Orsida tuku 16:00, Prezidente Repúblika (PR) Francisco Guterres Lú Olo sei fó pose ba Rui Augosto Gomes atu asume hikas Ministru Finansas (MF), tanba atuál MF Fernando Hanjam moras todan no seidauk rekopera hikas.

Komunikadu Imprensa ne'ebé www.tempotimor.com hetan husi prezidénsia repúblika hateten, PR Lú Olo nomeia Rui Gomes ba MF liuhusi Dekretu Prezidente Repúblika númeru 68/2020 hodi asume pasta Ministru Finansas iha VIII Governu Konstitusionál.

"Konstituisaun Repúblika Demokrátika Timor-Leste artigu 106 númeru 2 atribui kompeténsia ba Prezidente Repúblika ba nomeasaun membru Governu, tuir proposta husi Primeiru Ministru," Komunikadu imprensa ne'ebé www.tempotimor.com asesu Segunda (23/11).

Iha komunikadu ne'e mós sita katak, molok PR Lú Olo fó pose ba Rui Gomes hodi sai MF, PR Lú Olo mós ezonera 'tebe sai' Fernando Hanjam bazeia ba orientasaun PM Taur Matan Ruak.

"Molok halo nomeasaun, liuhusi Dekretu Prezidente Repúblika númeru 67/2020, Prezidente Repúblika ezonera Ministru Finansas Fernando Hanjam, tuir proposta husi Primeiru Ministru Taur Matan Ruak nian," sita husi komunikadu.

Entretantu serimónia tomada posse ba Ministru Finansas Rui Augusto Gomes sei hala’o ohin, 23 Novembru 2020, tuku 16.00, iha Palásiu Prezidénsiál Nicolau Lobato.

PR Lú Olo uza nia podér konstitusional bazeia ba alinea h husi artigu 86 K-RDTL ne’ebé hateten foti, fó posse no hasai membru governu, tuir proposta Primeiru Ministru nian, iha termu númeru 2 artigu 106.(*)

 

 

Rate this item
(0 votes)
Last modified on Monday, 23 November 2020 14:11
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items