Ezijénsia ne’e estudante sira hato’o iha diálogu komemorasaun tinan 28 kapturasaun komandante em xefe Kay Rala Xanana Gusmão, hamutuk ho eis Prezidente Repúblika José Manuel Ramos Horta, iha Igreja tuan Letefoho, Sesta (20/11).
Estudante Rosalina do Carmo Soares iha sesaun husu no hatan, nia ezije justisa ba aktu ne’e tanba konsidera hatudu imajen aat ba mundu, liuliu lei ne’ebé deputadu sira rasik prodús iha Parlamentu Nasionál vale de’it ba ema kiik sira.
“Realidade akontesimentu iha Parlamentu Nasionál, deputadu sira baku fila meza. Ida ne'e la lori ba tribunál, tanba sá?. Ita boot sira hakarak hanorin saida ba ami jerasaun foun sira. Tanba saida mak lei ne’e vale deit ba povu kiik?,” nia preokupa.
Ba kestaun ne'e, Ramos Horta hatán, “sé baku fila meza, baku fila kedeira, ha'u nu'udár ema santu, ha'u perdua sira. Tanba sira la baku malu, la halo kanek malu, nervozu oitoan, entaun baku fila meza”, Horta hatan.
Horta esplika ba estudante sira katak, meza ne’e deputadu sira hadi'a tiha ona ho meza foun ida tan, maibé nia admira oitoan tanba sosiedade no demokrasia halo ema barak hirus loos, povu hirus, ho akontesimentu ne’e.
“Mais ne'e hatudu saida, eipah, hatudu imi nia estandar, imi nia nível ke aas teb-tebes, imi ezije komportamentu husi polítiku sira. Ne'e ha'u admira, mas ha'u hare buat ne'e ha'u tuur iha ne'ebá ne'e ha'u hamnasa tan fali”, Horta ko’alia ho espresaun hamnasa.
Maske nune'e, nia hare reasaun husi povu mak la hamnasa, tanba povu hirus, ida ne'e mak nia admira katak afinál, sosiedade TL ezije komportamentu no figura husi husi polítiku sira.
Horta fó ezemplu katak, iha Inglaterra deputadu sira hakilar malu iha parlamentu, mais nunka iha tuku meza. Amérika mós hanesan, sira raut malu, mas nunka haree baku fila kadeira ka meza , la hare depuatada sira atu riba-malu iha no Australia mós laiha. (*)