Horta Kontente Bainhira TNI Kaptura Xanana iha 1992

Eis Komandante en Xefe das FALINTIL ne'ebe borgol hela hafoin kaptura husi TNI sira iha Lahane Dili iha loron 20 fulan Novembro 1992 Eis Komandante en Xefe das FALINTIL ne'ebe borgol hela hafoin kaptura husi TNI sira iha Lahane Dili iha loron 20 fulan Novembro 1992 Foto Suplai

Tempotimor (Letefoho)- Eis Reprezentante CNRM, Premiadu Nobel da Pás no eis Prezidente Repúblika Repúblika, José Manuel Ramos Horta, sente kontente bainhira rona informasaun dehan Tentara Nasional Indonesia (TNI) kaptura ona komandante Em Xefe Frente Armada Libertasaun Nasionál Timor-Leste (FALINTIL) , José Alexandre Kay Rala Xanana Gusmão iha loron 20 fulan Novembru tinan 1992.

Horta konta tuir situasaun ne’e, bainhira selebra aniversáriu kapturasaun Xanana Gusmão iha Lahane Dili ba dala 28, hamutuk ho estudante liu atus rua (200) iha eskola Sekundária Jerál Nossa Senhora do Carmo Letefoho, munisípiu Ermera, Sesta (20/11).

“Prímeiru, ha'u kontente, tanba sá, aban nia la mate, bain-rua nia la mate, tanba tempu luta ne'e, ita nia líder bo-boot, militár, Komite Sentrál FRETILIN lubuk ida mate no ha'u lakohi avó Nana atu mate,” Horta konta tuir.

Horta konta tuir no espresa sentimentu, hodi responde pergunta husi estudante eskola Sekundária Jerál Katólika Nossa Senhora do Carmo Letefoho, Mariana Fátima Soares, ne'ebé husu kona-ba oinsá Horta nia sentimentu bainhira ema kaptura Xanana iha tinan 1992, tanba iha altura ne’ebá Horta rasik iha hela Nova Yorke.

Horta hateten, situasaun iha momentu ne'ebá, dala-ruma kala-kalan la toba, tanba sempre okupadu, dala-ruma ema ruma telefone ba Horta iha tuku-tolu dadeer, tuku-haat, tuku-neen dadeer, husi Austrália, husi Díli, Jakarta ne'ebé hateten, maun Xanana monu iha embuskada.

“Kuandu kaer nia, ha'u dehan enviadu, maibé mós book-aan imediatamente para sira la tortura, la oho nia. Purtantu, ida ne'e mak susesu boot ami hotu-hotu ninian iha liur, susesu boot ita hotu-hotu nian, ami iha liur, Igreja iha laran no frente klandestina sira hotu,” diplomata senior ne’e hateten.

Horta konsidera katak, bainhira ema kaptura Xanana, ninia situasaun hanesan ho líder boot Áfrika nian Nelson Mandela.

Nia konta tuir katak, Nelson Mandela uluk sai nu'udár advogadu iha Afrika Súl, iha tempu rejíme apartai no nia kontra rejíme apartai, rejíme minoritáriu, depois ikus mai sira kaer Mandela hodi halo julgamentu.

“Sira permite duni nia halo nia defeza, nia mak halo nia defeza rasik, ita lee Mandela nia defeza, hanesan, intelektuál, filózofu, jurídiku, di'ak teb-tebes, mas sentensa nia ba tinan 27 prizaun, iha illa ida naran Roben Ailen, no nia nunka monu, tinan 27 mak iha ne'ebá, nunka hanesan hakruuk ba rejíme,” Horta konta tuir.

Durante tinan 27 iha prizaun, nia hatutan, laiha ema ida ba vizita Mandela, hafoin tempu naruk, ikus mai ema fó autorizasaun ba Mandela nia feen atu ba vizita no bainhira mundu muda, apartai monu, ikus mai Mandela sai husi prizaun hodi assume kargu hanesan Prezidente ba nasaun Áfrika Súl nian.

Nia dehan tan, bainhira Xanana sei iha Cipinang Indonézia, líder no diplomata boot ida ne'ebé vizita ba maka Nelson Mandela, tanba iha momentu ne'e, Nelson Mandela sai ona hanesan Prezidente Áfrika Súl.

“Ami ba Áfrika Sul, ha'u rasik iha Tempo ne'eba ba ho kolega balun, ida be akompaña ha'u ne'e doutór Roque Rodriguês, ema ida diak teb-tebes. Ami husu ba Mandela, favór ita ba Indonézia vizita ofisiál husiu vizita ami nia líder. Ami esplika líder ne'e oinsá, no nia bá, husu ba Soeharto katak, ha’u hakarak hasoru Xanana Gusmão, no Soeharto autoriza. Purtantu, istória ne'e di'ak teb-tebes”, Horta haktuir ho kontente.

Partisipa iha komemorasaun tinan 28 kapturasaun Kay Rala Xanana Gusmão, ne’ebé hala’o iha Igreja tuan Letefoho mak hanesan diretór eskola sekundária Jerál Katólika Nossa Senhora do Carmo Padre Hélio Fernandes, Vigáriu Parokiál Padre Eugénio Redentór Marques Caunan Lafo, frater estajiadu sira no profesór sira. (*)

Rate this item
(3 votes)
Last modified on Sunday, 22 November 2020 21:22
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« November 2020 »
Mon Tue Wed Thu Fri Sat Sun
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Tempo Timor Networks