Print this page

COVID-19 Lori Impaktu Pozitivu iha Rai Laran

By November 19, 2020 2366
Xefi gabineti Primeiru Ministru, Azevedo Marçal hato'o hela deskursu iha eventu ruma iha Ministeiru Finansas Ai Tarak Laran Xefi gabineti Primeiru Ministru, Azevedo Marçal hato'o hela deskursu iha eventu ruma iha Ministeiru Finansas Ai Tarak Laran Foto Fanpage Xefe Gabinete PM

Tempotimor (Dili) – Xefi gabineti Primeiru Ministru, Azevedo Marçal konsidera surtu Corona Virus (COVID-19) lori impaktu pozitivu iha rai laran tanba halo ema la halo férias ba estranjeiru hanesan antes, maibé idaidak fila fali ba ninia knua durante tempu férias.

Azevedo Marçal rekoñese katak, COVID-19 iha duni impaktu negativu, maibé buat ne’ebé nia nota katak impaktu pozitivu ba rai laran mak boot liu.

Nia fó ezemplu katak, antes ne’e iha família barak gosta liu halo paseiu ba rai liur hanesan Bali Indonézia iha tempu férias, maibé surtu COVID-19 halo ema hakbesik fila-fali ba familia iha knua.

Azevedo hatutan, Gabinete Primeiru ministru liu husi sentru integradu jestaun krize iha responsáblidade atu akompanã evolusaun sortu COVID-19 hodi ajuda estadu Timor-Leste hasoru enfrenta situasaun ne’e.

"Durante ne'e ferias sempre ba Bali, agora ita komesa ba Foho, distritu, Munisipiu, ne'e impaktu diak, buat ruma sempre do'ok husi familia, agora ita fila-fali mai uma, familia, fila ba knua, ne'e impaktu pozitivu," Azevedo hateten lia hirak ne’e iha CCD, Tersa (17/11).

Azevedo esplika, objetivu husi ekipa estudu analiza impaktu COVID-19 halo diskusaun meza redonda hodi buka solusaun liu husi diskusaun iha seitór oi-oin, nune'e kontribui hanoin ba governu hodi reforsa tan planu rekoperasaun ekonomia ne'ebé daudaun ne'e implementa.

Entertantu, Sentru jestaun krize hala’o hela semináriu iha CCD ho tema Impaktu ekonomia husi COVID-19 ho nia solusaun imediata ba Timor-Leste ne'ebé partisipa husi ekipa analiza ne'ebé lidera husi Francisco Guterres, inklui Prezidenti KKFP Juvinal Dias no sosiedade sivil. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items