"Husu ba mana na’in-rua, kuandu mai iha plenária tenke tau roupa formál hanesan zás, no hateke mai ami mak ko’alia, labele fila-fali kadeira tuur sorin mai ami mak ko’alia, ne'e la loos, ne'e labele!", Olinda Guterres durante halo intervensaun iha plenária PN ho lian makaas, Tersa (17/11).
Nia dehan, ba iha plenária PN, la'ós hasoru ema 'baibain', maibé hasoru deputadu no deputada sira, nune’e presija tau roupa formál.
"Deskulpa, señor ministru ha'u korríje oitoan, mana balun ne'ebé hatais mutin husi sorin mai, tuur ho sorin de'it mak ko’alia, ne'e labele", Olinda ko’alia iha plenária.
Tuir nia, kna'ar deputadu sira iha direitu no devér atu halo krítika, la hare ba nia opozisaun ka bankada governu, maibé nia iha direitu atu krítika.
"Ba ha'u la'ós eskola ba tasi-mane, ka tasi-feto ka tasi-oan ka, tasi-oan-mane. Karik ha'u husu nia, Ita-boot sira ha'u hatene maka kuda ai-farina ne'e, maizumenus fulan hira mak nia isin, ou fehuk ruma mak ha'u kuda karik mós, fulan hira mak nia bele isin. Ida ne'e karik ha'u hatene", Olinda rekoñese aan.
Nia mós sente triste, iha MPRM, feto barak mak servisu iha ne'ebá, maibé iha feto na’in rua de'it mak bele partisipa iha audiénsia públika hodi halo diskusaun ho deputadu no deputada sira iha plenária PN.
Maske nune'e, nia kontente tanba iha Ministériu Petróliu no Rekursu Minerais (MPRM), bele involve mós nia feto maluk sira hodi hola parte iha ministériu refere bele hare ba rukusoin TL nian.
Partisipa iha audiénsia públika ne’e hodi akompaña ministru Victor da Conceição Soares maka hanesan prezidente Timor Gap, prezidente ANP ho seluk tan. (*)