Xefe governu ne’e hatene katak implementasaun programa ne’e todan, maka, presija involve membru governu barak, hodi halo lansamentu, maibé la'ós membru governu husi partidu Frente Revolusionáriu Timor Leste Independente (Fretilin) de'it, iha mós husi KHUNTO no PLP.

"La'ós membru governu husi partidu FRETILIN de'it mak partisipa iha lansamentu ba programa sesta bázika ne'e, maibé involve mós husi Ministru Agrikultura no Peskas (MAP) Pedro dos Reis no Sekretáriu Estadu Ambiente (SEA) Demétrio Amaral. Entaun, pratikamente governu tomak liu-liu sira ne'ebé iha relasaun iha área ne'e hotu inklui seitór privadu sira," PM Taur hateten lia hirak ne’e iha Palásiu Prezidensiál Bairru-pité, Tersa (17/11).

PM TMR subliña katak, prosesu ida ne'e primeira vez ne’ebé governu ne’e halo no todan, tanba ne'e presiza hotu-hotu servisu hamutuk atu bele susesu, tanba tuir nian, prosesu uluk kona-ba transferénsia $100 ne'e ba agregadu familiár, maibé ida agora ne'e ba ema ida.

"Tuir informasaun totál populasaun TL agora sa'e ona ba tokon 1.5, ne'ebé la'ós kamaan, tanba ne'e presiza involve parte hotu-hotu," xefe governu ne’e hateten tan.

Alende ne'e apoiu suplementu renumeratóriu ba dadus reklamente sira ne'ebé molok ne'e governu promete loron 15 no sai fali ba fulan rua resin, PM dehan, loloos horseik (16/11) semana ne'e hahú ona, maibé sei problema hela.

"Loloos ne'e horseik hala'o ona, maibé sei iha problema tékniku, entaun sei demora tan, mas ha'u fiar katak ita sei hadi'a hotu lista sira ne'e, tanba lista sira ne'e mai husi Ministériu Administrasaun Estatál (MAE), nune'e bainhira hotu ona mak sei haruka ba MSSI hodi halo transferénsia osan, nune'e sei lentu oituan," nia esplika.

PM Taur mós husu ba populasaun ne'ebé seidauk hetan subsídiu $200, hein ho pasiénsia, tanba governu la haluha sira-nia direitu.(*)