Tuir embaixadór Lee, nu'udar parseiru di'ak mak molok husik Timor-Leste kumprimenta hela aman ba povu no nasaun Timor-Leste.

"Ha'u halo ona ha'u-nia misaun tinan tolu iha TL no misaun ne'e remata ona, entaun ohin ha'u mai kumprimenta hela PR tanba aban ha'u fila fali ba Koreia," embaixadór Lee hatete ba jornalista sira iha Palásiu Prezidensiál Bairru-pité, Tersa (17/11).

Embaixadór ne'e mós dehan, durante tinan tolu, iha programa lubuk ida mak halo ona, maibé iha programa tolu mak durante ne'e fó liu prioridade no ezekuta ho diak.

"Governu Koreia iha ajénsia naran COICA iha ne'e, durante ne'e halo servisu ho governu Timor-Leste no ami foka ba área oioin, maibé iha área tolu mak ami tau importansia liu mak edukasaun, dezenvolvimentu rurál, saúde no ida ikus liu importante mak destakamentu traballadór timoroan nian ba servisu iha Koreia durante ne'e," nia hateten.

Nia esplika, rezultadu ne'ebé hatudu iha nia misaun mak foin lalais iha dezenvolvimentu área rurál ne'ebé la konsege halo semináriu, maibé governu Timor-Leste komprometidu atu implementa programa ne'e liuhusi programa Programa Nasionál Dezenvolvimentu Suku (PNDS), komesa tinan oin nune'e bele kontribui ba dezenvolvimentu povu nian.

Hafoin embaixadór espresa servisu durante misaun iha TL, PR Lú Olo apresia ba kooperasaun ativa embaixadór Lee nian durante ne'e.

"Prezidente Repúblika apresia kooperasaun ne'ebé durante ne'e povu husi nasaun rua ne'e halo no Prezidente enfaze iha soldadu Koreanu na'in lima ne'ebé mak mate iha Timor, sira ne'e sai hanesan símbolu ida ba kooperasaun ne'ebé mak metin liután entre Korea ho Timor," nia hateten.

Alende ne'e PR Lú Olo mós esplika, kona-ba kondisaun lei sira ne'ebé iha TL atu posibilita investór husi rai liur liu-liu husi Korea mai TL.

Embaixadór Lee mós garante katak, embaixadór foun ne'ebé sei mak troka nia, sei kontinua kooperasaun ne'ebé durante ne'e TL no Koreia iha ona.(*)