“Prosesu buka saudozu Nicolao Lobato nia ruin ne'e, Estadu Timor-Leste halo negósiasaun ho Estadu Indonesia hotu ona”, MNEK Adaljiza Magno hateten lia hirak ne’e, hafoin hasoru-malu ho Primeiru Ministru Taur Matan Ruak iha palasiu governu, Tersa (17/11).
Adaljiza Magno informa, kestaun ne’e sai ona hanesan ajenda MNEK, tanba ne'e, ministériu sei esforsu atu oinsa bele buka tuir.
"Sim, ida ne'e sai hanesan ajenda ba Ministériu Negósiu Estranjeiru kle’ur ona, ami sei hare, tanba asuntu ne'e sei iha oportunidade halo diálogu ho governu Indonésia. Esforsu halo ona, agora ita hein de'it oinsa, estadu Indonesia mak dehan ba ita", nia esplika.