Virginia hato’o “sadik” ne’e tanba nia hare katak, orsamentu ne'ebe governu preve liu husi Proposta OJE 2021 nian, hamutuk rihun $500 deit, enkuantu iha proposta OJE 2020 ne'ebe hetan sumba iha PN ne'e hamutuk millaun $20.
Nia husu atu governu klarifika tanba saida mak tau osan rihun $500 de’it atu investe dada kadoras, Será ke governu mak laiha duni intensaun atu halo kontinuasaun ba projetu ne'e ka oinsa.
Deputada ne’e ko’alia tanba bankada CNRT iha observasaun ida katak, to'o agora governu seidauk halo estudu kle’an ba projetu dada kadoras liu-liu seidauk kria planta LNG.
"Maibé, ami hare katak, governu ida ne'e laiha intensaun duni, ha’u hakarak hateten katak, deskukpa pelu termus, maibé governu laiha duni intensaun atu dada kadoras mai Timor-Leste, no lakohi duni atu halo planta LNG," Virginia hato’o kestaun ne’e ba Ministériu Petróleo no Minarai liu husi audiénsia publika OJE 2021 ho Komisaun C iha PN, Tersa (17/11).
Kona-ba desizaun preve osan rihun $500, deputada ne'e konsidera osan ne'e kiik tebes, maibé nia lahatene intensaun loloos husi governu.