Komadante Jerál PNTL, komisariu Faustino da Costa hateten, dividas PNTL nian balun hahu selu ona no balun sei hare ninia prosedimentu.

"Enkontru ne'ebé ha’u halo ho Primeiru Ministru hanesan Ministru interior, hodi aprezenta situasaun iha teritóriu nasionál, kada semana, aumezmu tempu kona-ba ezekusaun orsamentu PNTL nian", Faustino hateten lia hirak ne’e hafoin reuniaun ho Primeiru Ministru Taur Matan Ruak iha palasiu governu, Segunda (16/11).

Nia mós dehan, iha sorumutu ne'e, PNTL aprezenta mós kona-ba dividas ne'ebé atu selu.

"Ida ne'e, ohin aprezenta mós ba Primeiru Ministru kona-ba dividas PNTL nian, balun hahú selu ona no balun sei hare prosesu", nia informa.

Komandante jerál ne’e rasik, seidauk hatene loloos montante ba selu dividas ne'e, maibé iha balun ne'ebé hahú selu ona.

"Dividas ne'e iha konbustivel, manutensaun viaturas, bens servisu seluk hanesan aluga kareta, EDTL, no Telemor hanesan CCTV", nia subliña.

Haree ba orsamentu ne'e sai kestaun nune'e mós sei la garante atu selu hotu dividas, maibé hare mos nia prosedimentu, se dokumentu kompletu ou lae hodi bele selu.

"Iha buat balun ne'ebé diak ona, eh buat balun presiza hadi'a, ida ne'e mak orientasaun husi Primeiru Ministru hanesan mós Ministru Interiór", Komjer hatutan.

Iha enkontru ne'e, Primeiru Ministru husu servisu polísia nian iha buat balun ne'ebé diak, eh apresiasaun mós ba kapitál Dili, maibé buat balun presiza reforsa atu hadi'a diak liu tan.

Entretantu, tuir nia situasaun jerál iha teritoriu nasionál la'o diak, laiha perturbasaun boot ne'ebé afeita ba estabilidade.(*)

PUBLISIDADE