Print this page

Lori Pamfletu "hatún" PR Lú-Olo ne’e Aktu Demokrátiku

By November 13, 2020 1899
Deputadu husi Bankada CNRT, Duarte Nunes iha plenaria Parlamentu Nasional Deputadu husi Bankada CNRT, Duarte Nunes iha plenaria Parlamentu Nasional Foto Suplai

Tempotimor (Díli)- Xefi bankada parlamentár husi partidu Congresso Nacionál Reconstruçăo de Timorensa (CNRT), Duarte Nunes hateten, asaun ne'ebé hala'o husi membru na’in-rua husi Movimentu Nasionál Defende Konstituisaun (MNDK), nu'udár aktu ida husi demkorasia ida ne'ebé joven sira hodi expresa sira nia hanoin.

Deklarasaun ne'e nia hato'o, hodi responde ba asaun PNTL munisípiu Dili nian ne'ebé hala'o identifikasaun no detein membru MNDK na’in-rua tanba deskonfia fahe broxura hatún Prezidente Repúblika (PR), Francisco Guterres Lú-Olo husi nia kargu.

Duarte Nunes dehan, nia rasik la akompaña direta prosesu oinsá PNTL halo identifikasaun ba membru MNDK na’in-rua, maibé tuir informasaun ne'ebé nia rona katak, polísia lori ona sira ba halo prosesu investigasaun.

"Ha'u la akompaña, ha'u rona dehan sira lori ona ba polísia ba halo ona investigasaun, ita hein de'it, tanba ha'u la akompaña, ne'ebé prontu ita hein de'it", Duarte Nunes hateten ba www.tempotimor.com iha PN, Sesta (13/11).

Tuir nia, hatudu asaun liuhusi hakerek liafuan iha pamfletu, la'ós kríme, maibé parte husi demokrasia ne'ebé ema hotu iha direitu no liberdade hodi hato'o nia expresaun.

"Ne'ebé buat ida pamfletu, saida ne'e, ita haree took nia gravidade to'o iha ne'ebé, tanba dala-ruma ida ne'e mós parte husi demokrasia atu expresa, joven sira mós hakarak expresa, ami mós iha parlamentu mós expresa", nia tenik.

Tanba ne'e, nia dehan, bainhira iha ona prova ruma husi situasaun sira ne'e ita haree took ita nia nasaun ne'e atu ba ne'ebé.

"Ida ne'e iha lei, aplika lei. Aplika lei mak ita hare", nia hakotu.

Entretantu, membru MNDK na'in-rua ne'e kompostu husi feto ida ho mane ida, ne'ebé fahe bruxura durante missa iha Igreja Motael no kontinua ho marsa da pas tuir dalan to'o Semiteiru Santa Cruz, Díli, inklui hakerek mós liafuan iha espanduk dehan, "Maluk Timoroan, Hadeer! Mai Ita Defende Konstituisaun, Ita Nia Lei Inan."

Antes ne'e Prezidente CNRT, Kay Rala Xanana Gusmao liu husi Intervista ho TVE iha loron 11 Novemro 2020 iha Leorema, halo apello ba mate Resto 12 Novembro 1991 ne'ebe uluk simu ordem husi Maun Bo'ot hodi organiza manistasaun iha tempu ne'eba.

"Ba Joven hotu-hotu ne'ebe agora katuas hoitu ona, ne'ebe uluk partisipa iha 12 de Novembro; ha'u husu bo'ot atu imi hotu hanoin nune'e, imi la terus iha 12 de Novembro, imi nia maluk sira la mate iha 12 de Novembro, para ita ukun a'an tiha, bele viola konstituisaun, bele viola leis, bele viola normas. Hodi ita nia estadu ita nia estadu de direitu demokratiku ne'ebe ita funu ba, fo ita nia vida ba ne'e, sai la vale tiha de'it. Hamriik to'ok ba. Hamriik to'ok ba. Hanoin to'ok ba, sa valor maka ita atu fo ba 12 de Novembro. Bainhira ita, momentu ida ne'e, ita nonok de'it, hare ba ema viola tun, viola sa'e bu'at sira ne'e hotu," apellu eis Komandante en Xefe das FALINTIL ne'e.

 

PUBLISIDADE

Rate this item
(0 votes)
Last modified on Saturday, 14 November 2020 00:27
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com