Planu prioridade tolu ne'e mak hanesan, Planu Estratéjiku Nasionál hodi Kombate Korrupsaun: ho nia Prioridade hametin dezenvolvimentu instituisionál ba komunidade nasionál no internasionál, prioridade Ikus liu Servisu makaas ho parseiru nasionál no internasionál hodi reforsa servisu investigasaun ba kriminalidade.

Komisáriu Anti Korrupsaun Sérgio Hornai hateten, planu ida ne'e KAK deside hodi hamosu tana tanba hakarak hametin servisu sira iha área seitór justisa nian.

"ita iha prioridade tolu ne'ebé mak ita reforsa iha ne'eba, ka fó konsentrasaun ba iha planu estratéjiku nasionál kombate korrupsaun," Sérgio ko’alia hafoin partisipa audiénsia públika OJE 2021 ho komisaun A no B iha PN, Sesta (13/11).

Kona-ba prioridade primeiru ne'e nia hateten, hare husi medida prevensaun no kombate korrupsaun, hateten katak, estadu TL presiza iha planu estratéjiku nasionál ida, tanba ne'e KAK mós hanoin presiza tau sasan sira ne'e iha 2021, atu nune'e hein katak, bele iha partisipasaun másimu, husi entidade sira hotu.

Nia mós hatutan iha prioridade ida seluk mak atu hametin dezenvolvimentu instituisionál, oinsa instituisaun ida ne'e bele hakbesik-an ba komunidade atu bele fó konfiansa ba komunidade nasionál no internasionál, liu-liu reforsa seitór justisa, ba iha politika prevensaun no investigasaun kriminál.

"ita bele mós servisu hamutuk ho autoridade kompetente hanesan ministériu públiku, sosiedade sivíl, média, no parseiru sira seluk, nune'e husi politika ne'e rasik bele mós dada rekoiñesimentu husi ema hotu katak, politika prevensaun ne'e la’ós ba ema ida ninian, maibé ne'e ba ema hotu-hotu,"nia deklara.
Prioridade ikus liu, nia dehan, ida ne'e sei reforsa liu-liu investigasaun kriminalidade, halo servisu makaas no parseria nasionál no internasionál, hodi hare kona-ba iha modus operande, ka krimi korrupsaun sira.

Kona-ba razaun hamosu tan prioridade hirak ne'e, tanba tuir nia, investigasaun kriminalidade ba seitór públiku no privadu, ohin loron sai hanesan dezafiu ba estadu, tanba ne'e KAK hanoin presiza tau responsabilidade.

Entretantu, pakote orsamentu ba KAK iha proposta OJE tinan fiskál 2021 totál millaun $2.5, ne'ebé sei kobre ba bens servisu, saláriu no vensimentu, kapitál menór, kapitál dezenvolvimentu, tranferénsia públika.(*)

PUBLISIDADE