Hare ba situasaun ne’e, maka, Komandu Polisia Nasionál Timor Leste (PNTL) munisípiu Dili orienta ninia membru hodi halo identifikasaun ba grupu ne’e no konsege kaptura mane ida ho feto ida ne’e lori mós panfletu (spanduk), ne’ebé hakerek liafuan protestu hasoru xefe Estadu.
Segundu Komandante PNTL Munisípiu Dili, Suprientendente Polísia Euclides Belo hateten, prende brosura no kaptura mós ema na'in rua, tanba asaun protestu ne'e la tama iha programa selebrasaun loron 12 Novembru, enkuantu grupu ne’e rasik partisipa iha marsa ne’ebé hahú husi Igreja Motael ba semitériu Santa Krus.
"Ohin iha rotunda estatua avó Xavier nian, depois de marsa, maluk sira husi sobrevivente, juventude no entidade estadu nian, tuir programa ne'ebé PNTL simu marsa ne'e programadu ona, laiha atividade seluk fora husi programa", Euclides hateten ba jornalista iha semitériu Santa Krus, Kinta (12/11).
Nia esplika katak, iha brosura ne'e nia konteúdu protesta xefe estadu, tanba ne'e komandu, Euclides rasik mak lidera, no prende duni brosura lubuk ida inklui pesoal na'in rua, mane ida no feto ida.
Ema na'in rua ne'e, oras ne’e daudaun submete hela ba eskuadra PNTL Vera Cruz hodi halo prosesu identifikasaun.
"Komandu PNTL munisípiu Dili konsidera asaun protestu ne'e, iha tendénsia ne'ebé bele konsidera laiha legalidade", nia konsidera.
Tuir Nia, asaun protesta xefe estadu ne'e laiha legalidade, tanba parte PNTL seidauk iha koñesimentu.
"Tanba ne'e, asaun sira ne'ebé halo iha públiku, PNTL konsidera la tama iha programa komemorasaun 12 Novembru tinan ne’e, ami asumi papél atu identifika, ninia prosesu hotu agora iha hela eskuadra vera cruz", nia relata.
Segundu komandante munsipiu Dili ne’e hatutan, depende ba atendimentu ne'ebé polísia halo, tanba brosura ne'e mos ninia konteudu polisia seidauk lee hotu, tanba sei konsentra atu garante seguransa ba programa 12 Novembru.
Entretantu, PNTL rasik seidauk hatene loloos identidade husi ema na'in rua ne'ebé kapturadu iha rotunda eis Prezidente Repúblika Francisco Xavier do Amaral merkadu lama.(*)
PUBLISIDADE
