Embaixadora Estadus Unidus Amérika dehan relasaun nasaun rua ne'e di'ak lo'os no ninia nasaun fo ona rai pedasuk ida ho uma baraka ida iha kapital nasaun refere hodi Timor Leste instala nia embaixada.
"En Termus de Embaixada ba Timor Leste, ami oferese ona uma (baraka) ida iha Washington DC ba Timor Leste sai nu'udar sira nia embaixada,' dehan embaixadora EUA, Kathleen Fitzpatrick ba jornalista sira hafoin hasoru malu ho Ministru Prezidente Konsellu Ministru iha palasiu Governu.
Embaixadora ne'ebe sai belun di'ak tebes ba VIII Governu ne'e dehan iha negosiasaun hotu, sempre ho espiritu resiprosidade.
Maibe tuir fontes kredivel Tempo Timor iha Governu Timor-Leste hateten, VIII governu avansa ho pontus resiprosidade, troka ekuivalente, katak, Timor-Leste husu fatin rua ba harii embaixada TL iha Washington no fatin ida
iha Nova Iorke hodi tau instalasaun ba misaun permanente rai ne’e nian.
“Maibé, governu Amérika la hatudu vontade di’ak atu tulun nasaun ne’e bainhira iha Dili, embaixada nasaun ne’e ezije atu Governu aprova lalais sira nia pedidu hodi nune’e sira harii sira nia embaixada ho totál osan tokon $300”, fontes ne’e hateten.
Fontes ne’e mós dehan, Amérika ko’alia mesak furak, maibé fó rai pedasuk no baraka oan ida ba Timor Leste, iha Washington, enkuantu iha Dili ninia embaixada luxu.
Entretantu, oras ne’e daudaun embaixada EUA iha Dili okupa eis residência governadór nian ho rai ektares tolu iha Tasi ibun Praia dos Coqueiros. (*)
PUBLISIDADE