Deputadu Marcos Xavier ko’alia ne'e tanba nia hare katak, orsamentu ne'ebé atu preve ba infraestrutura la tama iha proposta Orsamentu Jeral Estadu (OJE) tinan fiskál 2021.
Tanba ne’e nia husu atu ministru Transporte no Komunikasaun tenke kumpre ninia promesa, tanba povu hakarak hare rezultadu.
"Ministru hateten atu muda terminal Bekora, Tasi tolu no Halilaran iha 2021, maibé ha’u hare iha livru proposta OJE 2021 ne'e laiha orsamentu ne'ebe preve iha ne'e. Se ministru ko’alia deit maibé realidade la tau osan ne'e ita bosok povu," deputadu Marcos Xavier kestiona liu husi audiénsia públika ho Ministru Transporte no Komunikasaun iha Plenaria PN, Kuarta (11/11).
Aleinde orsamentu ne'e, nia parte mós preokupa ho mekanizmu governu nian atu muda terminal tolu ne'e, tanba prosesu atu muda terminál ne'e, governu presiza halo uluk koordenasaun ho komunidade nune'e evita problema.
