Armanda prontu simu Kritika tanba bele hadi’a programa ne'ebé MSSI aprejenta, sei lori benefisiu no lori dezenvolvimentu ba povu no nasaun.
"Laiha intensaun balun, tanba politika sempre hanesan ne'e. Importante mak fó hanoin ne'ebé konstrutivu atu hadi’a, iha programa ruma ne'ebé ladun diak, kritika ne'e normal tanba tenki iha kritika mak bele hadi’a.
Karik laiha Kritika, hotuhotu nune'e deit entaun ita gasta tuir ita nia hakarak laiha ema ida hase," Armanda hateten lia hirak ne’e iha Parlamentu Nasional Dili, Kuarta (11/11).
Atuál Prezidenti Partidu KHUNTO ne'e louva deputadu sira ne’ebé sempre halo kritika no ida ne’e nia konsidera diak tebes tanba bele kontribui ba MSSI liuliu relasiona ho planu Orsamentu Jerál Estadu 2021 nian.
"Orsamentu ne'ebé mak ita husu mos apoiu ba povu ninian atu hadia no dezenvolve nasaun, la’ós atu ba ema ida-rua, maibé oinsa mak bele hare ba oin iha ita nia nasaun ida ne'e," Armanda subliña.
Entertantu MSSI iha OJE 2021 preve millaun $62 nune'e ohin ministra Armanda halo audiénsia ho Komisaun F asuntu Saude, Seguransa Sosial no Igualdade jeneru iha Parlamentu Nasional.