“Regra iha Parlamentu Nasionál nian bainhira buat ruma atu lori ba debate iha plenária ne’e hetan ona aprovasaun iha nível komisaun”, dehan Prezidente Parlamentu Nasionál, Arão Noé de Jesus Amaral, iha Parlamentu Nasionál, Tersa (23/4).

Líder parlamentar ne’e subliña, relatóriu ne’ebé la aprova ne’e hola esperiénsia iha 2012 nian, bainhira relatório Komisaun Inkéritu Parlamentár nian kona-ba foos la aprova iha nível komisaun mak labele lori ba plenária to’o agora. Tanba ne’e, Parlamentu labele halo buat ruma ne’ebé sees husi konteúdu legal.

“Relatóriu ne’e nulu ka bele dehan laiha ona, tanba prazu loron sianulu ne’ebé parlamentu fó, sira la uza ho másimu hodi aprova relatóriu ne’e, entaun relatóriu ne’e la vale ona”, tenik nia.

Prezidente PN mós haforsa Governu la depende másimu ba relatóriu KIP hodi halo pagamentu ba projetu 143 ne’e.

“Governu selu ne’e bazeia ba prosesu legál ne’ebé iha, la’os tanba desizaun polítika ne’ebé Komisaun Inkéritu Parlamentár halo, bele halo apresiasaun mós, maibé tenke haree ba projeitu legál, kontratu iha no tuir kustu kontratu nian ADN halo avaliasaun depois rekomenda halo pagamentu”, dehan Arão.

Arão mós dehan, tanba relatóriu Komisaun Inkéritu Parlamentar nulu ne’e mak atu hapara fali prosesu legál ne’e la loos.