Prezidente Tribunál Rekursu (PTR) Deolindo dos Santos hateten, dívida ne'ebé iha, la'ós kona-ba projetu, maibé ba funsionáriu no juiz sira ne'ebé hasa'e eskalaun, entaun laiha osan atu selu, tanba ne'e orsamentu 2020 nian TR sei selu dívida hirak ne’e.

"Dívida ne'ebé iha kuaze millaun $1 resin, entaun atu selu ba retroativa, la'ós tanba tusan projeitu nian, mezmu iha manutensaun ka reparasaun tribunál nian ne'e iha, maibé pratikamente osan ne'e atu selu funsionáriu sira ne'ebé hasa'e sira-nia eskalaun ba promasaun iha karreira, hanesan mós juiz sira, ne'ebé aumenta sira-nia eskalaun orizontál no promosaun vertikál tanba sira hetan kargu rua," PTR Deolindo hateten ba jornalista sira iha Palásiu Prezidensiál bairru-pite, Tersa (10/11).

Nia mós dehan, durante ne'e labele selu sira, tanba osan DOT ne'ebé iha bazeia ba pakote ne'ebé TR iha.

"Durante DOT ne'e bazeia ba pakote ne'ebé ita iha, entaun ita labele selu sira no ida ne'e la'o iha tempu naruk nia laran hahú kedan 2017 to'o agora. Entaun, dívida sira ne'e akumuladu no aumenta fulan ba fulan, tanba ne'e ema-nia direitu, tanba ne'e hakarak ka lakohi ita tenke selu, tanba ne'e lei mak haruka," Deolindo subliña.

Prezidente Tribunál ne'e mós afirma, bainhira TR konsege selu dívida sira ne'e iha 2020, maka iha 2021 TR laiha tan ona dívida.

"Se iha 2020 mak ami konsege selu dívida sira ne'e, entaun ha'u bele afirma ba ita-boot sira katak iha 2021 ne'e, tribunál laiha tan dívida atu selu. Sei bele iha, maibé buat kiik oan liu ne'ebé labele selu tanba ezekusaun ne'ebé la'o iha Novembru no Dezembru ne'e, tanba sistema pagamentu sei taka iha loron 10 Dezembru. Entaun, hahú husi 10 Dezembru ba leten ne'e hanesan viajem sira ne'e labele selu, so ba tinan oin de'it," nia esplika.

Entretantu proposta OJE 2020 ba Tribunál Rekursu (TR) hamutuk millaun $4,925,292 ne'ebé prevé ba saláriu no vensimentu millaun $2.941,021, bens no servisu millaun $1.984,271 inklui ba kapitál menór, kapitál dezenvolvimentu no transferénsia públika zero.

Alende ne'e husi millaun $4.925,292 koloka ba Konsellu Superiór Majistratura Judisiál (KSMJ) rihun $11, Tribunál Rekursu iha saláriu no vensimentu millaun $1.813,914, bens no servisu millaun $1.810,914, Tribunál

Distritais saláriu no vensimentu millaun $1,127,097 no bens servisu rihun $162,357.