"Ida ne'e planu ministériu asuntu veteranus nian iha 2020, atu halo uma 60 ba veranus ida ne'ebé 24 anus nian, no 2021 atu halo tan 40, no restu sei halo tan bainhira orsamentu tinan oin mai fali”, Riak Leman hateten lia hirak ne’e, hafoin hasoru-malu ho Primeiru Ministru Taur Matan Ruak iha palasiu governu, tersa (10/11).

Tuir nia, veteranus ne’ebé luta durante tinan 24 nia laran agora la to'o 100, tanba balun mate ona.

"Maibé, tanba depois de funu hotu, ita nia gerileiru ou veteranus sira tun husi ai-laran mai balun uma no rai laiha, loron-loron ba halo to’os no hare karau, liu-liu maluk sira husi Lospalos reziaun um, depois Vikeke, Baucau veteranu barak mak susar no balun mate tan tiha ona", nia subliña.

Nia dehan, Orsamentu rihun $40 ba veteranu sira ne'ebé luta durante tinan 24 nia laran, maibé sei susar mak, Konsellu Kombatentes Libertasaun Nasionál (KKLN) no Ministériu Asuntus Kombatente Libertasaun Nasionál sei forma ekipa ida atu halo akompañamentu.

"Konserteza Konsellu ho Ministériu tenke harii ekipa teknika ida atu tun ba kontrola, sira halo duni uma ou lae, tanba ha’u hare dezeñu ida Ministériu halo ne'e, modelu ida de'it, uma tenke hanesan", nia akresenta.

Riak Leman hatutan, se halo uma barak hamutuk iha fatin ida de'it, veteranu sira hela mos ladun diak, tanba sira tenke hela iha ida-idak nia fatin nune’e bele halo sira nia atividade lor-loron.

"Nu'udár veteran, halo hela nia to’os, plantasaun, hakiak kuda no karau iha fatin ida, agora nia ba hela iha uma mamuk la besik ida ne'e, han no hemu saida. Entaun, diak liu halo uma tuir ida-idak ninia hela fatin no nia hakarak, se lae ita halo hamutuk iha fatin ida ema laba hela, animal mak tama fali ba hela iha uma, ne'e la dun diak", nia esplika tan.

Tuir dadus, veteranus ne’ebé luta durante tinan 24 ne'e, Lospalos barak liu, tuir fali Baucau, Vikeke, Same iha na'in rua, maibé ida mate tiha ona, Likisa na'in 3 ou 4, hanesan mos Manatutu.