Fatubai hatete, durante ne’e ekonomia rai laran la avansa tanba Timor-Leste dependensia ba importasaun husi estranjeiru, kuaze tinan 10 no iha Parlamentu Nasionál aprova orsamentu ne'ebé bo'ot, maibe produtu báziku hanesan fos, mina, supermie kontinua importa husi liur.
Deputadu bankada Fretilin ne'e akresenta, ho surtu Covid-19 ne'ebé akontese iha mundu, VIII governu konstitusionál hanoin hodi implementa programa rekoperasaun ekonomika liuhusi sesta bázika hanesan maneira atu hasa’e produsaun rai-laran.
"Ita hare'e katak, kuaze tinan barak ita investe barak iha natar Kambodia, Vietname, ema nia natar iha ne'ebá buras tebes, ita nia iha ne'e maran par mate, tanba sa tinan sanulu ita aprova osan hodi hola deit ema nia produtu," Fatubai kestiona iha Parlamentu Nasional Dili, Segunda (9/11).
Fatubai hatutan, tinan sanulu governu gasta osan barak ona, maibe povu kontinua moris sofre liu fali tinan 24 okupasaun Indonézia.
Tanba ne'e, Fatubai apoia no fo apresiasaun ba implementasaun programa rekoperasaun ekonomika 'sesta bazika' husi VIII governu, tanba konsidera bele hasa'e ona produsaun agrikultór inklui bele motiva povu iha kapitál fila ba munisípiu hodi halo natar.
Antes ne'e, deputadu husi bankada opozisaun CNRT Fernanda Lay kritika no konsidera governu kria programa sesta bázika atu 'bosok povu' tanba iha inplementasaun sesta bazika, governu fahe mós pepsodente ba populasaun atu kose nehan.
Tuir Lay, pela primeira ves governu hatudu sira nia solidaridade pepsodente, 0,50 sentavus ne'ebe ho folin kiik oan hodi fó ba populasaun.