Deputadu ne’e husu tanba tuir nia haree, iha distribuisaun bote husi SEA ba populasaun Metinaru, fó posibilidade boot atu populasaun hotu mós tenke hetan bote ida ne'e, no labele halo diskriminasaun ba populasaun iha fatin seluk.
"Ministru bele asegura ka lae, iha fulan Novembru no Dezembru ne’e possível, atu ministru lori trek bobo’ot hodi sa'e to'o suku no aldeia sira iha foho ne'eba atu fahe bote ne’ebé hanesan fahe tiha ona iha Metinaru. Se la konsege, entaun sira ne'ebe simu ho sira ne'ebé seidauk simu ne'e justisa iha ka lae," António hateten liu husi audiénsia públika OJE 2021 iha sala plenária PN, Segunda (9/11).
Iha fatin hanesan Deputada CNRT Virgína Ana Belo husu governu tenke garante duni produsaun bote ne'ebé governu planeia.
Nia fo ezemplu katak, komunidade iha uma kain ida, kuandu sira ema na’in sanulu ba leten, bote ne'e mós tenke to'o sanulu ba leten, nune'e labele iha diskriminasaun.