Print this page

Aniceto “Lakohi” Ko’alia Orsamentu Privativu PN Boot

By November 09, 2020 1392

Tempotimor (Dili)- Orsamentu Jerál Estadu (OJE) 2021 iha ona Parlamentu Nasionál (PN) iha ne’ebé montante orsamentu privativa ba PN rasik boot ho millaun $16.984,066.

Montante ne’e halo Prezidente Parlamentu Nasionál (PPN) Aniceto Guterres “tauk” atu ko’alia sai, tanba lakohi sai diskusaun públiku, liuliu tauk atu ema aproveita hodi halo defamasaun.

PPN Aniceto hateten, di'ak liu iha debate OJE tinan fiskál 2021 nian mak jornalista sira hatene de'it, tanba montante orsamentu boot, entaun bele mosu diskusaun públiku.

"Ha'u lakohi temi montante orsamentu privativu PN ne'e hira, ita boot sira akompaña tiha ona, orsida ha'u temi sala númeru, ema balun aproveita situasaun ho númeru sira ne'e para ataka ka disfama ema, tanba ne'e ha'u lakohi ko'alia kona-ba númeru," PPN Aniceto Guterres dehan ba jornalista iha Palásiu Prezidensiál Bairru-pite, Dili, Segunda (9/11).

Lider orgaun lejisladór ne'e mós deskonfia katak, jornalista sira iha intensaun aat hodi buka hatene orsamentu privativa ba PN.

"Imi husu totál orsamentu PN nian, tanba saida mak osan boot hensan ne'e? Imi hatene tiha ona pois imi husu tan, husu bei-beik, imi iha intensaun saida?," katak Aniceto.

Maske montante orsamentu privativa ba PN ne'e PPN lakohi divulga sai ba públiku, maibé tuir dadus ne'ebé www.tempotimor.com asesu iha livru panorama OJE 2021 nian hetan katak, totál orsamentu ba PN hamutuk tokon $16.984,066.

Husi totál orsamentu ne'ebé iha ne'e sei aloka ba programa importante lima hanesan, programa 031 ne'ebé sei haforsa relasaun internasionál no kooperasaun parlamentu nian, programa 159 ne'ebé sei garante ezersísiu ba funsaun sira konstituisionál iha parlamentu, programa 160 ne'ebé sei promove kuultura ida nakloke no tranparensia iha PN, programa 412 ne'ebé sei implementa ba polítika jéneru no programa 51o ba governasaun di'ak no jestaun instituisionál.

Alende ba programa sira ne'e, orsamentu sira ne'e mós sei aloka ba saláriu no vensimentu tokon $5.581,038, bens no servisu tokon $6.250,029, kapitál menor rihun $492.796, kapitál dezenvolvimentu tokon $3.000,000 no transferénsia públika tokon $1.660,203. Ne'ebé ho totál orsamentu privativa ba PN tinan fiskál 2021 nian hamutuk tokon $16.984,066.

Rate this item
(0 votes)
Last modified on Monday, 09 November 2020 19:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items