Tanba ne’e, durante mandatu hodi hala’o misaun UNICEF iha Timor-Leste, Valerie Taton halo esforsu hodi kombate no konsege hatudu ona progresu ne'ebé diak.

Reprezentante Unicef Valerie Taton hateten lia hirak ne’e hafoin hasoru malu ho Primeiru Ministru Taur Matan Ruak iha palasiu governu, Dili, ohin.

Nia dehan, durante parseria ho governu Timor-Leste iha progresu barak ne'ebé atinji ona, maibé iha dezafiu barak ne'ebé hasoru.

"Progresu ne'ebé durante ita haree asuntu ida boot tebes mak kona-ba mal nutrisaun, agora ita haree iha progresu ne'ebé diak", nia esplika.

UNICEF mós fó ninia kontribuisaun boot tebes ba Ministériu Saúde hodi hala'o peskiza ida kona-ba ma nutrisaun iha Timor-Leste.

"Ikus ne'e, ita haree iha labarik barak mós fila ona ba eskola, maibé ita sei hasoru dezafius barak", nia observa.

Tuir nia, importante loos maka governu tenke investe ba labarik sira, bainhira moris mai atu labarik kontinua ho nutrisaun diak.

"Nutrisaun ne'ebé diak, inklui promosaun susuben inan nian durante fulan 6, bainhira labarik ne'e moris mai boot ona tinan 2 ou 3 ona, tenke garante asesu ba edukasaun", nia sujere.

Ida ne'e mak, kontinensia boot UNICEF nian atu apoia governu Timor-Leste hodi introdus teknolojia informasaun iha área edukasaun nian.

"Apoiu sira ne'ebé UNICEF fó, serbisu hamutuk ho Ministériu Edukasaun, Saúde, MSSI, Ministeriu Justisa, Ministeriu Obras Publika, oinsa atu haree lejislasaun sira kona-ba labarik nian, tuir fali mai haree asisténsia públika sira ba labarik la'o loloos ona ou sidauk", nia subliña.