Munisípiu hitu ne'ebé SEKoop responsabiliza ba distribuisaun programa sesta bázika mak hanesan Kovalima, Ainaro, Manufahi, Aileu, Manatutu, Likísa no Lospalos.

“Iha ona kompañia 30-resin mak submete sira nia dokumentu no sira prontu atu hala’o, la'ós de'it iha Suai, maibé iha munisípiu seluk ne'ebé mak SEKoop responsábiliza. Iha Suai iha Kompañia lima mak submete iha ne'e”, Sekretáriu Estadu Kooperativa, Elizário Ferreira hateten asuntu ne’e hafoin lansamentu programa Sesta Bázika iha suku Tazhilin, postu administrativu Zumalai, munisípiu Kovalima, Sábadu (07/11).

Nia dehan, SEKoop kontrata kompañia sira ne'e la'ós halo tenderizasaun, maibé kompañia lokál ka nasionál ne'ebé de'it mosu ba iha sekretária, hotu-hotu hetan avaliasaun no sei partisipa iha sosa no distribuisaun produtu ba komunidade.

Nia esplika, governu labele sosa direta produtu husi povu, tanba ne'e maka governu halo parseria ho kompañia sira hotu ne'ebé hakarak hola parte iha atividade rekoperasaun ekonómika atu bele kontribui ba melloramentu ekonomia populasaun nian.

Tanba ne'e, nia hatutan, la'ós emprezáriu sira mak tenke hetan lukru barak, maibé ida ne'e programa ida ema bolu dehan rekoperasaun ekonómiku, signifika, emprezáriu sira ne'ebé hola parte, sira mós parte integrante husi parseria governu nian atu bele harii hikas kondisaun ekonomia povu.

“Bainhira povu nia ekonomia di’ak, emprezáriu sira mós automatikamente bele benefisiadu, no mós bele asesu. Sé povu nafatin moris iha ki’ak, emprezáriu mós kiak nafatin”, nia subliña.

Kona-ba montante orsamentu ne'ebé uza hodi sosa produtu husi komunidade, Elizário dehan, orsamentu bazeia ba populasaun, tanba populasaun ida hetan $50 dolloar, sé ema rihun 80.000 iha Kovalima, signifika 50x80.000.

Entretantu, lansamentu dahuluk ba programa sesta bázika iha suku Tazihilin, komunidade hamutuk 2.853 mak hetan.