Ministru Asuntu Parlamentár no Komunikasaun Sosial (MAPKOMS), Francisco Martins da Costa Pereira Jerónimo hateten, Valérie ba halo despedida ho nia tanba bainhira sai ministru, Valérie Taton mós ba hasoru nu'udár reprezentante misaun UNICEF nian iha TL hodi informa kona-ba sira nia progresu serbisu.
"Tanba nia misaun remata ona atu fila-fali ba nia rain, entaun nia despede no husu ko’alia ho ha'u oitoan kona-ba saida mak nia halo durante ne'e", Francisco Martins da Costa Pereira Jerónimo hateten lia hirak ne’e iha palasiu governu, ohin.
Tuir nia, kooperasaun ho UNICEF dezde primeiru governu to'o ohin loron la'o kapas no di'ak, no bainhira nia ba asume kargu ministru durante mandatu, sira hasoru malu beibeik hodi fó mós ajuda, la'ós buat boot hotu, maibé pelu-menus ajuda malu atu bele halo buat ruma ba rai ida ne'e.
"Hanesan iha rádiu komunidade, labtop, sira bele ajuda atu nune'e bele funsiona. Entaun ami nia kooperasaun ne'ebé mak la'o, durante ne'e di'ak tebes", nia dehan.
Nia espera katak, ema seluk ne’ebé atu substitui Valérie, sei halo kontinuasaun nafatin ba atividade ka programa sira ne'ebé durante ko’alia ba malu ona, no kooperasaun ne'e sei la'o ho di'ak liu tan.
Reprezentante misaun UNICEF iha TL, Valérie Taton esplika, buat ne'ebé nia alkansa ona iha TL, bele haree progresu barak mak atinje tiha ona, ida mak iha área edukasaun, saude, maibé sei iha buat barak mak presiza kontinua.
"Buat barak teb-tebes mak ita sei hala'o tan iha timor atu hetan progresu ne'ebé di'ak liu tan, ba futuru labarik sira nian iha TL, maibé ha'u nia tempu ne'e limitadu tebes", nia hateten.
Nia sente hetan enérjia ida ne'ebé pozitivu teb-tebes, bainhira hala'o misaun servisu iha TL, no nia hein katak ida ne'e bele motiva servisu sira seluk atu bele atinje buat ne'ebé mak di'ak liu ba futuru labarik sira nian.