Xanana deklara asuntu ne’e hafoin observa direta fatin akontesimentu kazu aldeia Terra-Santa Raikotu suku Madohi, postu administrativu Don Aleixo, munisípiu Dili.

“Sai sasin ba iha problema ida iha Topu Honis. Ne’e mos ha’u dehan ona ba Tribunál katak, se amu ne’e mak sala, hau primeiru ne’ebé mak kondena. Maibé, se amu ne’e la sala, ha’u mak primeiru atu defende nia tanba hare iha ne’ebá kahur buat barak tebetebes iha ne’ebá”, Xanana hateten.

Entretantu, eis Prezidente Repúblika no lider nasionál, Kay Rala Xanana Gusmão antes ne’e tenke tuur iha kadeira justisa nian iha Tribunál Distritál Dili, hodi fó sasin ba prosesu providénsia kautelár kona-ba publikasaun relatóriu Komisaun Justísa no Paz (KFJ) Arkedioseze Díli.

Xanana fó sasin ba notifikasaun kazu ne’ebé rejistadu ho NUC 0278/20 CV/ TDD, aprezenta husi JU,S Juridico Social Consultoria ba Ministériu Públiku iha loron 29 Setembru 2020 ho karatér urjénsia ne’ebé arsebispu Don Virgilio do Carmo da Silva, no Padre Herminio de Fátima Gonçalves (Eis Prezidente Komisaun Justisa no Paz) hodi hatan kona-ba relatóriu komisaun nian ne’ebé espalla iha média sosiál faceebok.

Xanana Gusmão deklara iha sala audiénsia katak, konteúdu husi relatóriu ne’e rasik haktuir kona-ba kazu ne’ebé antes ne’e akontese iha uma mahon Topu Honis, maibé relatóriu ne’e rasik konfidensiál no la’ós sai konsumu públiku.