"Durante finadu, iha insidente balun ne’ebé mak akontese iha teritóriu Timor-Leste, hanesan insidente ne'ebé akonstese iha munisípiu Aileu, iha loron (3/11) iha tuku 20:15, ne'ebé joven ho inisiál JS ho idade 21, taa ema na'in tolu iha aldeia Kirulolo, Suku Liurai, postu administrativu Aileu vila. Nune'e, suspeitu agora iha hela sela detensaun hodi kumpri oras 72," Portavoz Komandu Jerál PNTL Superintendente xefe Arnaldo Araújo hato’o liuhusi konferénsia imprensa, Kuarta (4/11).
Nia mós esplika liu tan, kazu insidente ne'e akontese, bainhira suspeitu no vítima sira ba festa kazamentu ida, maibé bainhira fila husi festa, suspeitu hein vítima sira iha dalan no halo kedas asaun ne'ebé konsege hakanek vítima na'in tolu ne'ebé dadaun ne'e halo hela tramanentu iha Ospitál Nasionál Guidu Valadares.
Alende husi insidente ne'e, iha mós insidente seluk ne'ebé akontese iha munisípiu Ermera postu administrativu Hatolia.
"Insidente ida iha Hatolia ne'e husi grupu rua. Entaun, iha Timor Telecom nia oin kedas, sira baku malu, no membru PNTL mai halo atuasaun ho profesionalizmu, uza stick mak dudu sira hodi labele iha tan konfrontu, maibé iha tempu ne'ebé nia dudu, stick ne'e kona fali ida nia kabás. Entaun, ema ne'e tuku fali membru PNTL ho inisiál LTH to'o kanek iha parte kabás," nia dehan.
Entretantu suspeitu ne'ebé hakanek membru polísia ne'e iha ona eskuadra Hatolia hodi halo prosesu investigasaun.
Komandante ne'e afirma, ses husi kazu insidente husi munisípiu Aileu no Ermera, kazu insidente mós akontese iha munisípiu Baukau ne'ebé joven sira baku malu, entaun rezulta ida kanek, no suspeitu balun detein ona, iha komandu PNTL munisípiu Baukau.
"Joven ida kanek, tanba sira baku malu, entaun daudaun ne'e suspeitu na'in tolu iha hela sela detensaun PNTL munisípiu Baukau no suspeitu sira seluk ne'ebé halai subar, forsa konjunta kontinua buka tuir para sira mós involve iha prosesu investigasaun," nia esklarese.
Ho kazu hirak ne’e, Superintendente xefe Arnaldo Araújo konsidera finadu tinan 2020 la'o ho di'ak, tanba PNTL toma nia servisu, nune’e buat hotu la'o ho kontroladu.
