Nia agradese ba preokupasaun husi públiku, tanba preokupa antes kedas kona-ba nia servisu, hodi bolu atensaun ba ministru nune’e labele halo sala.
Tuir nia, kilat ba PSIK, la'ós hanesan kilat ida ne'ebé ema tau iha facebook ho nia modelu naru-naruk, tanba ida ne'e brinkedu ida, no kilat loloos ba PSIK ne’e kiik liu.
"Kilat tau ba PSIK ne'e, la'ós kilat ida ne'e ida, ne'e plástiku ida. Ha'u hakfodak tanba ema tau loos gambar ne'e iha facebook. Husik sira tau, tanba sira lahatene saida mak sira ko’alia", Ministru Justisa Manuel Cárceres klarifika hafoin reuniaun Konsellu Ministru iha Palásiu Governu, kuarta (04/11).
Nia hatete, bainhira nia seidauk sai ministru, iha dekretu Lei númeru 15/2014, kona-ba estatutu orgániku PSIK nian iha artigu 20 dehan, PSIK lori no uza kilat.
Dekretu lei ida ne'e Prezidente Repúblika (PR) mak promulga, no Konsellu Ministru (KM) mak aprova iha 2014.
"Depois iha 2018, hasai regulamentu ida bainhira mak PSIK ne'e bele uza nia pistola ne'e, nia uza ba halo saida, uza oinsá, ne'ebé la'ós lor-loron nia parlenta iha estrada ne'e ho pistola ne'e, lae", nia klarifika liu tan.
PSIK uza arma tanba sira la’ós ba halo investigasaun kriminál de'it, maibé sira simu mós mandadu kapturasaun husi Ministériu Públiku (MP) ka husi tribunál atu ba kaer ema.
"Ba kaer ema ida lori droga ne'e, ó ba kaer liman tanan de'it, nia hurlele fali PSIK, kazu ne'e lakon tiha de'it, tanba ne'e sira presiza proteze aan", nia subliña.
Kona-ba ba empeñamentu uzu armas, nia dehan, regulamentu númeru 25/2018, husi lei orgániku PSIK nian hateten, bainhira uza la loos, duni sai de'it.
"Tanba duni PSIK ida, nia la haruka rekursu ministru ba iha Tribunál ida", nia hateten tan.
Nia eplika liu tan katak, kilat neebé PSIK sira utiliza, la'ós atu uza kilat parlenta loro-loron iha estrada ibun, maibé, bainhira simu ordén husi Tribunál ka Ministériu Públiku (MP) atu ba kaer kriminozu mak foin lori pistola.
"Hotu tiha mai hatama fali kedas iha Armériu (Armajen Kilat), ne'ebé iha regra empeñamentu", nia esplika.
Husu kona-ba modelu kilat ne'ebé PSIK sira uza, nia dehan, kiik liu kuaze 19/9 milimetrus, ne'ebé nia tau iha bolsu mós ema lahatene.
Entretantu, tuir estatutu orgániku PSIK nian, tutela ba Ministériu Justisa (MJ), tanba nee Ministériu Justisa rasik mak sei kontrola.
