Horta hateten, tenke halo despedida ho embaixadór na'in tolu ne'ebé atu fila hikas ona ba sira ida-idak nia rain, tanba uluk sira mai hala'o misaun nu'udár diplomata iha nasaun Timor-Leste.

"Ohin ita halo despedida ho embaixadór na’in-tolu, ne'ebé fila ba sira nia rain ", José Ramos Horta hateten ba jornalista iha Faról, kinta (29/10).

Nia esplika, embaixadór na'in tolu, hanesan bainaka atu fila presiza halo despedida ho sira, tanba nasaun hirak ne'e iha relasaun diak ho Timor-Leste.

"Uluk kuandu ha’u Prezidente Repúblika ho nu'udár Ministru Negósiu Estranjeiru no Kooperasaun ha’u sempre enkontru ho embaixadór, kuandu sira to'o no fila, ha’u oferese jantar, almosu ba sira. Tanba ne’e, ita halo diplomasia nune'e, tenke buka hanesan kultiva hametin relasaun sira", nia hateten.

Nia hatutan, molok embaixadór sira fila, konvida sira mai halo despedida, tanba ne'e halo festa simples ida ho hahan ne'ebé prepara husi Timor-Leste ninia produtu rasik.

"Ha’u mos konvida artemoris mai atu halo sira nia expozisaun, no espera ema sosa sasan balun, ha’u iha ona promesa ema balun atu sosa sasan", nia dehan.