Ho preokupasaun ne'e, Ministru Jerónimo husu ba jornalista sira, ba oin tenke kuidadu ho situasaun ne'e, atu oinsá mak labele hamosu dúvida ba públiku.
"Ida ne'e ha'u hanoin presiza kuidadu, tanbá dalaruma ita boot sira mai tiha ona ho asumsi ida katak, buat ida seidauk loos, maibé ita boot sira dehan katak, ida ne'e hanesan ne'e tiha ona," Ministru Francisco Jerónimo hato'o preokupasaun ne'e, bainhira halo intervensaun, iha atividade lansamentu ba Treinamentu Jornalista Komprensivu, iha Edifísiu Konsellu Imprensa, Kintal Boot, kinta (29/10).
Tuir nia, maske jornalista hakarak ema ne'e tenke hato'o duni informasun ba públiku, bazeia ba jornalista sira nia asuntu, maibé informasun ida ne'ebé tenke iha faktu.
"Tanbá Dala barak populasaun sira mos kestiona, kona-bá dalaruma jornalista sira mai, mai tiha ona ho asumsi ida," kestiona nia.
MAPKomS fiar katak, ho treinamentu ne'ebé Konsellu Imprensa kria ba jornalista sira ne'e, sei bele fó motivasaun no oinsá mak fasilita jornalista sira, domina iha informasaun, liu-liu hakle'an jornalista sira-nia koñesimentu, kona-bá kódigu jornalista nian, hanesan 5W+1H.