Tuir nia, iha 2018 CNRT mak lidera Aliansa Mudansa no Progresso, ne’ebé povu fó fiar ba forma governu, maibé CNRT rasik mak harahun fali AMP, no aktu ida ne'e tenta atu hamonu Primeiru-Ministru Taur Matan Ruak, maibe FRETILIN hola nia responsabilidade defende VIII governu tenke ukun to’o mandatu remata.

"Ohin loron, de facto CNRT laiha governu ona, pela primeira vez ba opozisaun, faktu ida konsumadu, tanba ne’e mak lakohi atu simu realidade," Dario hateten liu husi deklarasaun politika iha plenaria PN, segunda (26/10).

Tuir nia, oras ne’e daudaun CNRT sofre hela Post Power Syndrome, tanba lakon ona poder hodi fila-fali ba opozisaun.

Nia hatutan, agora maka CNRT foin hakfodak bolu “governu de facto” no “Primeiru Ministru mau pagador”.

"CNRT nia lideransa ukun, hatene gasta deit osan ka sai governu despezista, maibé lideransa Primeiru-Ministru Taur Matan Ruak, hakarak haree rezultadu konkretu iha povu nia moris lor-loron, ida ne’e mak diferensa," nia hateten.

Deputadu ne’e mós konsidera CNRT toman ona, hodi akuza arbiru, hanesan uluk iha 2002, primeiru governu konstitusional foin kaer ukun fulan neen, Prezidente Repúblika tempu ne’ebá, iha komemorasaun loron 28 novembru hateten: “Governu ukun fulan 6 ona povu sei halerik nafatin”. Agora 2020 mós hanesan, VIII Governu foin ukun fulan 4 dehan fali ona assesor barak tebes, maibé ferik katuas sira sei halerik hela.

Ne'e duni nia hatete, CNRT haluhan dékada ida resin gasta osan biliaun $14 kala la uza assesores. Ukun dékada ida resin gasta osan biliaun $14, foin mak hare ferik ho katuas sira nia moris oinsa, haré tok mós ba

veteranus ho nia oan sira nia kondisaun moris, hanesan veteranu 24 anos Salvador da Silva “Salarubi” ne’ebé tuku lata hodi hatutan moris, Ida nee mak rezultadu ukun dékada ida resin ka oinsa.

"Hare mós ba estudante sira nia kondisaun eskola, livru, haris fatin no bé mós, ne’ebé tuir PEDN 2011-2030 defini katak, iha 2015 konstrui no re-habilita ona edifisiu pré-eskolar 253 ho sala aula hamutuk 758. Konstrui no re-habilita ona edifisiu ensinu sekundáriu 64 ho sala de aula 1.280. Tinan 2015 labarik sira ho deficiênsia liu 40% mak acesso ba ensinu báziku iha ne’ebé," nia deklara.

Nia hatutan, hospital nasional ho referal sira, klinika no postu saúde sira, médiku, enfermeiru no parteira sira nia kondisaun servisu ne’ebé tuir PEDN 2011-2030 define katak, iha 2015 Estadu regula ona servisu saúde husi fornesedor privadu sira no setor naun lukrativu, tuir sistema saúde públiku nian.

Katak, to’o 2015 garante ona ezistênsia no jestaunn apropriadu ba transporte inklui ambulânsias no kareta multi-funsaun.

Too 2015 65% inan tuur ahí hetan atendimentu husi profissional saúde sira, no 90% edifisiu saúde nian acessu ona ba eletrisidade, bee mós no saneamentu báziku ne’e iha oa ka lae.