Tuir Lere, saudozu ne'ebé loke dalan mak, sauzodu Casmiro maibé to'o agora governu la tau matan ba faluk no oan kiak sira.

"Imi mós akompaña, iha fatin-fatin ita-nia saudozu sira mate, governu sira ba hamriik iha ne'ebá katak, sira sei tau matan ba faluk no oan ki'ak sira, mais to'o agora ne'e ema ida seidauk tau atensaun ba feto faluk no oan ki'ak," dehan Xefe Estadu Maiór Jerál F-FDTL Maijór Jenerál Lere Anan Timur hafoin presta omenajem ikus ba saudozu Buka Tuir iha kuartel jenerál Fatuhada, Dili, Sesta (23/10).

Lere mós subliña, saudozu ne'ebé loke dalan ba saudozu seluk hodi tuir mak, saudozu Casmiro, maibé to'o agora governu nia promesa la akontese.

"Hahú ho saudozu matebian Casmiro, ne'ebé loke dalan, veteranu tinan 24, ne'ebé mate iha 2000, ha'u mak ba hakoi, maibé ate agora lahatene nia familia iha ne'ebé, ema mós lahatene. Depois iha Saudozu Ular, governu dehan sei tau matan ba faluk no oan ki'ak, hola rai para halo uma, maibé laiha, entaun ha'u dehan polítika de'it, maibé di'ak liu mak familia konfia nia aan," dehan Lere.

Iha momentu ikus hodi despede malu ho saudozu Buka Tuir nia mate isin, Lere dehan, instituisaun lakon ema di'ak ida ne'ebé iha poténsia ba futuru.

"Ita lakon ema di'ak ida, ofesiais di'ak ida, kamarada ida iha instituisaun ida nia laran. Nia (saudozu) mós faz parte kontribui ba harii instituisaun ida ne'e no harii mós ita-nia estadu ida ne'e," dehan Lere.

Komandante ne'e mós afirma, maske nia mate ona, maibé tenke rekoñese nia servisu, luta no sakrifísiu sira.

Entretantu saudozu João Francisco de Fátima "Buka Tuir" husik hela fen no oan na'in haat kompostu husi feto rua no mane rua.