Ho formasaun ne'e, Eis-Administradór Postu-Administrativu Iliomar, Abílio Quintão Pinto, lori povu Iliomar tomak nia naran, hato'o agradesimentu ba SEKoop, tanbá apoia ona formasaun ba membru kooperativa sira, hodi bele hasa'e sira koñesimentu, atu kontinua dezenvolve sira-nia atividade kooperativa, bele avansa ba oin.
Abílio hato'o deklarasaun ne'e, bainhira reprezenta Administradór Postu-Administrativu Iliomar, hodi halo abertura ba semináriu ho tema, "Dezenvolve Ekonomia Lokál Iha Kooperativa", iha salaun Administrasaun Postu-Administrativu Iliomar, Munisípiu Lautém.
"Uluk nana'in obrigadu barak ba Sekretáriu Estadu Kooperativa nian, ne'ebé iha inísiu fihir ona hanesan alvu ida, kooperativa tenke moris iha Iliomar. Ida ne'e mak hanoin ami nia situasaun real, iha ne'e, dala ida tan, ba sua-exelénsia nia atensaun, ami agradese tebes, ami nia kondisoens mak ne'e, oinsá ita bele hamutuk, ita bele haburas ita-nia kooperativa ne'e", hatete Eis-Administradór Postu-Administrativu Iliomar, Abílio Quintăo Pinto, ba jornalísta sira, iha Postu-Administrativu Iliomar, kinta (22/10).
Tuir nia, bainhira kooperativa ne'e buras, automatikamente ema mos bele buras, tanbá kooperativa sai xave ba ekonomia, liu-liu atu Estadu bele investe.
"As vezes osan mai tiha, mais nain ida-rua de'it mak hatene, maibé sé mak membru mos la hatene, sé mak atu empresta (pinjam) mos la hatene, atu rai (simpang) iha ne'ebé mos la hatene", dehan nia.
Ho menus koñesimentu hosi membru kooperativa nian, kona-bá empresta no rai osan, Eis-Administradór konsidera, ida ne'e sai problema boot ba sira, tanbá ne'e, tuir Autoridade ne'e katak, liu hosi semináriu bele aumenta sira-nia koñesimentu iha setór kooperativa nian.
"Tanba ne'e, ohin ba oin, ami iha garantia katak, ita hamutuk bele hadi'a situasaun ida ne'e", dehan nia.