António Konsidera Estrutura TG Anteriór 'Falla' iha Proporsaun Substituisaun das Rezervas Mina Nian

Prezidente Timor Gap seaante Francisco Monteiro kaer liman ho atual Prezidente Timor Gap António José Loyola de Sousa iha momentu balun ba kotuk. Prezidente Timor Gap seaante Francisco Monteiro kaer liman ho atual Prezidente Timor Gap António José Loyola de Sousa iha momentu balun ba kotuk. Foto Supply

Tempotimor (Dili)-Liga ba proporsaun jestaun rezerva ne'ebé faktu hatudu katak zero, maka Prezidente Timor Gap António José Loyola de Souza promete sei lidera Timor Gap ho estudu ne'ebé kle'an ba proporsaun aubstituisaun rezerva mina nian.

Tuir Prezidente Konsellu Administrasaun Timor Gap António José Loyola de Sousa katak, ba futuru sei halo estudu kle'an hodi hatene kona-ba proporsaun substituisaun rezerva mina nian.

"Tinan hira nia laran, ita laiha esforsu tomak hodi fó proporsaun no jestaun ba rezerva ne'e laiha, entaun ba oin, ita tenke esforsu ita-nia aan hodi halo peskiza sesmi para to'o perfurasaun, tanba ita la halo perfurasaun maka ita la hatene, ita-nia mina iha ka lae, halo mak laiha mós risku maibé risku liu kuandu ita la halo," dehan Prezidente Timor-Leste António iha UNITAL, Sábadu (17/10).

Nia mós dehan, iha mandatu tomak sei lori Timor Gap hodi servisu di'ak liu ba Timor-Leste.

"Oinsa mak Timor Gap tenke mai ho ninia estudu ida ne'ebé kle'an loos, para iha 2022 ne'e ita bele hatene rekursu ka rezerva mina no gas hira mak sei iha rai okos, seráke iha posibilidade para dezenvolve ba oin ka oinsa, se laiha alternativu saida mak sei foti," dehan nia.

Prezidente ne'e mós dehan, preokupasaun ne'ebé iha mak, proporsaun jestaun rezerva ne'e zero.

"Rezerva ne'ebé ita foti tiha ona, tenke iha fali rezerva seluk para bele mantein sustentabilidade ba fundu petrolíferu, tanba iha faze ida agora ne'e faktu hatudu katak ita-nia proporsaun jestaun rezerva ne'e zero, tanba bayu undan ba tiha, laiha kampu seluk ne'ebé mai atu hali produsaun," nia tenik.

Iha fatin hanesan, Prezidente Autoriedade Nasionál Petroleu no Minerais (ANPM) Florentino Mateus Soares Fereira katak, relasiona ho Bayu Undang ne'ebé para ona bele lori TL ba faze kritika.

"Ita hatene katak husi sesaun kontratu Bayu Undang nian bele lori povu no nasaun TL ba faze krítiku teb-tebes, tanba depois Bayu Undang ses ka para, ita tama ona iha sesaun ida ne'ebé laiha produsaun ka laiha reseita," dehan Prezidente ANPM.

Nia mós dehan, ho situasaun atuál ne'ebé iha, maka ANPM ho Timor Gap mai partilla ba estudante sira kona-ba planu ba futuru, saida mak presiza halo hodi responde ba situasaun ne'e nomós oinsa lori TL ba oin para bele hetan reseita adisionál husi petrolíferu.(*)

Rate this item
(0 votes)
Last modified on Thursday, 22 October 2020 08:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.