Tuir PM Taur, orsida loraik governu sei entrega proposta OJE 2021 ba Parlamentu Nasionál (PN).
"Ohin mai informa ba Prezidente Repúblika (PR) katak ohin prazu ikus ba OJE 2021 nian, tanba ne'e governu esforsu hela para buat hotu la'o di'ak para lokraik entrega ba PN," dehan PM Taur iha Palásiu Prezidensiál bairru-pite, Kinta (15/10).
PM mós afirma, kona-ba seitór krusiál sira governu servisu maka'as atu prevé osan boot.
"Ita halo esforsu para aloka ba seitór importante sira hanesan Edukasaun, Saúde, Turizmu, Ekonómiku, Sosiál, Infraestrutura no Dezenvolvimentu Instituisionál, ita tau hotu osan," katak PM.
Entretanti husi montante totál OJE 2021 nian ne'e governu prevé, tokon $239.26 ba saláriu no vensimentu, tokon $421.49 ba bens no servisu, tokon $669.91 ba transferénsia públika, tokon $61.14 ba kapitál menor no tokon $503.20 ba kapitál dezenvolvimentu.