Nia hatutan, hanesn plenáriu ohin nian, deputadu sira foti kestaun liu-liu kona-bá Ministériu Saúde, ho repartisaun estudante sira, maibé ida ne'e MAPKomS fó ona resposta katak, agora Ministériu sei ba ko'alia ho Ministériu sira seluk, nune'e oinsá foti desizaun atu rezolve lalais kestaun hirak ne'ebé deputadu sira foti.
"Kona-bá kestaun sira ohin, liu-liu kona-bá Ministériu Saúde ho repartisaun estudante, i ha'u ohin responde ona katak, agora duni ha'u ba informa kedas ba Ministériu konpetente," dehan nia, iha Parlamentu Nasionál, (PN), tersa (13/10).
Nia hatutan, deputadu sira mos levanta kestaun estrada no eletrisidade, maibé tuir MAPKomS katak, antes ne'e, iha debate Orsamentu Jerál Estadu tinan 2020 ne'e, deputadu sira kestiona ona, kona-bá asuntu ka problema hirak ne'e, Ministru rasik esplika ona ba sira no sira akompaña hela, tanbá ne'e, MAPKomS la presiza esplika tan.
Nia relembra hikas, iha diskusaun plenáriu segunda no tersa liu ba, deputadu sira hato'o preokupasaun barak, maibé tanba Ministériu Asuntu Parlamentar koopera ho Ministériu sira di'ak tebes, ho ida ne'e, atualmente sira hakerek ona karta mai, iha Parlamentu Nasionál, nune'e sei fahe ba kada deputadu sira.
"Husi parte Governu nian, ohin fó de'it informasaun ba deputadu sira katak, kestaun hirak ne'ebé mak deputadu sira foti, liu-liu iha segunda-tersa, iha semana-semana sira antes debate Orsamentu Jerál Estadu, ami hakerek hotu ona, karta i haruka hotu ona karta, hanesan buat ida karik hakerek hotu ona i karta ne'e haruka hotu mai ona i resposta Ministériu ida-idak haruka ona mai, iha Parlamentu Nasionál, atu fahe ba deputadu sira, kona-bá saida mak sira foti," Hatete nia.