Tuir informasaun husi fontes www.tempotimor.com ne’ebé besik partidu maioria iha plataforma governu konstitusional daualu, Ministru Fernando sei aprezenta nia karta rezignasaun ba Primeiru Ministru Taur Matan Ruak.

“Ami rona ona Ministru Finansas hato’o ona nia intensaun atu rezigna aan husi nia kargu tan ba problema saúde,” dehan fontes ne’ebé husu www.tempotimor.com labele publika nia identidade.

Iha Tersa (13/10), dader Ministru Fernando hala’o enkontru ho ida ho Primeiru Ministru Taur Matan Ruak.

Tuir fonte ne’e, iha enkontru ho PM Taur ne’e Ministru Fernando hato’o ninia intensaun atu rezigna an.

Prezidente da Republika, Dr. Francisco Guterres Lu Olo, iha palasiu Prezidensial, fo pose ba Fernando Hanjam nu'udar Ministru Finansas iha loron 29 fulan Maiu 2020 hamutuk ho membru foun na’in-hitu husi VIII Governu Konstitusionál mak hanesan Vise Primeira-Ministra Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál , Francisco Martins da Costa Perreira Jerónimo, Ministru Administrasaun Estatal Miguel Pereira de Carvalho, Ministra Saúde Odete Maria Freitas Belo, Ministru ba Assuntu Kombantentes Libertasaun Nasionál Júlio Sarmento da Costa ‘Meta Mali’, Ministru Agrikultura no Peskas Pedro dos Reis.

Fernando Hanjam la marka prezensa, iha debate OJE tinan 2020 iha semana kotuk, deputadu sira husi PD kestiona ninia auzensia no deputada husi bankada CNRT ezije Primieru Ministru troka tiha MF Hanjam maibe PM Taur Matan Ruak defende, tanbá kondisaun saúde, MF la marka prezensa.

To'o notisia ne'e hatun, Tempotimor.com seidauk konsege hetan konfirmasaun ho Ministru Finansas Fernando Hanjam no Xefe Governu.