Liu husi komunikadu imprensa neebé www.tempotimor.com asesu iha Tersa (12/10) informa, KM aprova ona tetu agregadu no dezagregada husi OJE 2021 ne'ebé aprezenta husi Vise Ministra Finansas, Sara Lobo Brites.
Orsamentu ho total billaun $1,895 nee, komunikadu nee hatete, sei implementa iha programa prioridade nasionál ne'ebé governu prepara ona ba tinan 2021.
"Tetu agregadu iha montante totál dollar amerikanu rihun millaun $1,895 ne'ebé inklui impréstimu sira, hodi kobre ba nesesidade husi programa no prioridade nasionál sira ne'ebé define ona Governu Konstitusionál VIII," deklara komunikadu nee.
Programa prioridade governu nian ba tinan 2021 mak, iha nível dezenvolvimentu kapitál sosiál, dezenvolvimentu ekonómiku ne'ebé aliñada ho medida sira ne'ebé iha planu Rekuperasaun Ekonómika, dezenvolvimentu infra-estrutura bázika fundamentál, dezenvolvimentu ambientál, dezenvolvimentu institusionál no prosesu kona-ba reforma institusionál sira ne'ebé la'o hela.
Husi montante totál OJE 2021, millaun $.239, 26 koreesponde ba saláriu no vensimentu,millaun $.421,49 refere ba bein no servisu, millaun $.669,91 korresponde ba transferénsia públika sira, millaun $.61,14 korresponde ba kapitál menor no millaun $.503,20 ba kapitál dezenvolvimentu.
Iha komunikadu dehan, tetu agregadu boot liu rendimentu sustentável, tanba iha senáriu neebé sira aprezenta, entaun governu tenke hili senáriu ida iha pontu daualu nian mak sei implementa iha tinan 2021.
"Loos duni katak iha senárius ne'ebé governu tenke hili, senáriu ida ne'ebé moderadu tuir mós rekomendasaun husi komisaun ekonómiku, ne'ebé aprezenta senárius un, dois, tres, pelumenus senáriu ida un-pontu-oitu maka governu hili atu bele implementa iha tinan 2021," dehan komunikadu ne'e.(*)