Prezidente Ezekutivu F-Kovana, Eládio Faculto hatete, F-Kovana moris ho prinsipiu atu tane Aas prinsipiu nasaun. Eis deputadu esplika, partidu mosu laos atu lori problema ba povu, maibe atu kore problema povu nian nune'e presija hametin demokrasia, alende ne'e koalia mos kona ba etika no moral iha nasaun.
"Forum ida ne'e ami hakarak iha futuru sei ajuda hanesan makina konvensedor ida para ajuda dialogu ida ne'ebé estadu presija i diálogu ne'ebé atu promove hametin demokrasia," dehan Eládio iha Parlamentu nasional Dili, Segunda (12/10).
Tuir Eládio iha Timor-Leste problema seriu mak bainhira ema utiliza media sosial hanesan Facebook atu trata malu, insulta, pinta karikatura no komunikadu ba malu laiha respeitu
Nia hatutan, situasaun hanesan bainhira akontesementu meza parlamentu nasional rahun, hanesan kanek no hamosu prekupasaun iha publiku, Tuir Eládio, parlamentu nasional mak fatin konsertasaun politika, fatin ba halo deskusaun politika maibe bainhira liu tiha ona emiti, lori fali emosaun no too ona faze la rona malu inklui deskuti malu liu baleira (batas) ne'e povu sira prekupasaun aas liu.
"Tan ne'e mak situasaun agora dadaun ne'e hatudu katak ita monu dekadensia, ita hasoru problema dekadensia, desagrega," dehan Eladio.
Nune'e Eládio akresenta joven sira labele aprende ho situasaun refere, bainhira hakarak halo diak ba nasaun Timor-Leste tenki valoriza ema idaida nia personalodade, matenek, argumentu, tenki simu ba lori ba oin.
Nune'e, F-Kovana nia esforsu hasoru ho PPN atu haree katak tenki iha konsertasaun politika, iha diálogu diálogu ne'ebé permanente, fo fatin ba partidu boot inklui kiik atu koalia i promove istoria.
"Programa ida insetersante mak iha futuru, ita bo'ot sira bele partisipa atu hare'e, kona ba lider sira nia aktu ne'ebé halo iha 20 janeiru 1986, ne'e bolu dehan konverzensia nasional, ne'e sira halo tanba uluk iha diverzensia hanesan ne'e," dehan Eládio.