Print this page

MOP: Governu Anteriór Uza Sistema Manuál, Eletrisidade Kontinua Mate-Lakan

By October 10, 2020 2147
MOP, Salvador Pires ko'alia ba Jornalista sira iha palasiu Governu hafoin KM extraordinariu iha Dili, Sexta (9/10) MOP, Salvador Pires ko'alia ba Jornalista sira iha palasiu Governu hafoin KM extraordinariu iha Dili, Sexta (9/10) Foto Tempo Timor

Tempotimor (Díli)- Ministru Obras Públikas (MOP), Salvador Pires hatete, eletrisidade dadaun ne'e, sei kontinua mate-lakan, tanbá sistema hirak ne'ebé, atu halo identifikasaun ba avaria ruma, sei kontinua uza sistema manuál ne'ebé husi tempu Governu anteriór.

Nune'e, dadaun ne'e, kontinua Governu esforsu maka'as, atu muda sistema manuál ba modernizasaun, hodi bele garante ba identifikasaun avaria ruma, iha liña eletrisidade.

"Ita boot sira hatene, iha tempu udan dalaruma ai-tohar iha liña, se la sala hodi kalan ai-tohar iha Bairro-Pite, ha'u esplika bei-beik ita-nia sistema ne'e manuál, ita-nia Governu anteriór sira investe ona, sistema produsaun no transmisaun", dehan nia, iha Palásiu Governu, sesta (09/10).

Atu garante funsionamentu eletrisidade ho di'ak, mak presiza investe iha parte distribuisaun nian, tanbá ne'e, maske dadaun ne'e projetu pakote 22 ne'ebé realiza ona iha Díli, maibé balun sidauk tama iha pakote.

"2021 espera ami-nia pedidu ba Komisaun Revizaun Orsamentu Polítika (KROP) no Konsellu Ministru aprova para bele inklui liña sira ne'ebé seidauk rehabilita iha Díli, atu nune'e bele prevene", tenik nia

Alende ne'e, investimentu longu prazu ne'ebé presiza mak dijitalizasaun.

"Tanbá ne'e, hakarak informa ba ita boot sira, ita husu ona Ministériu Finansas atu buka fundus esterna empréstimu, tanbá nia montante oitoan para bele dijitaliza tiha, ita-nia sistema distribuisaun iha Díli laran, atu tékniku sira mais fásil identifika, lokalizasaun avaria", Nia akresenta

Tanbá, dadaun ne'e, iha avaria ruma ne'ebé boot, fásil ba tékniku sira atu halo identifikasaun, maibé bainhira iha avaria ki'ik, difísil atu identifika ho lalais.

"Se ita seidauk halo rehabilitasaun ka modernizasaun sistema, ita-nia maneira identifika avaria hanesan ne'e nafatin, kuandu avaria ki'ik mak sira loke ahi hodi buka, kuandu ahi haksoit sira foin hatene iha ai-rin ida ne'e no ne'ebá, sira foin ba buka didi'ak, tanbá ne'e, dalaruma lakan tiha mate fali," Nia hakotu. (*)

PUBLISIDADE

Rate this item
(0 votes)
Last modified on Saturday, 10 October 2020 08:51
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items