Polimika EUA Rehabilita Aeroportu Baucau, Lere: Governu Baralla Situasaun

Aeroportu Baucau Aeroportu Baucau Foto Suplai

Tempotimor (Díli)- Antes ne'e, iha ona konsensu husi Xefe Estadu Maiór F-FDTL, Majór Jenerál Lere Anan Timur ho Xefe Estadu Forsa Armada Amérika nian, atu halo rehabilitasaun ba Aeroportu Baucau, maibé ikus mai, Governu Timor-Leste baralla tiha konsensu refere.

Tuir Majór Jenerál Lere Anan Timur katak, Governu halo baralla, tanbá la kompriende kooperasaun tékniku militár nian, entre forsa defeza nasaun rua ne'e, tanbá Governu tauk no deskonfia katak, Amérika atu sai fali na'in ba Aeroportu Baucau.

"Amerikanu sira agora preokupadu, tanbá polítiku sira, halo baralla tiha ona sasan sira ne'e, komplika tiha. Maibé asuntu kona-bá Aeroportu Baucau ne'e, ha'u ho Almirante Xefe Estadu Forsa Armada Amérika nian, ko'alia tiha ona, ami bazeia ba ami-nia kooperasaun tékniku militár," dehan Majór Jenerál Lere Anan Timur, iha Palásiu Prezidensiál Bairro-Pite, Díli, kuarta (7/10).

Líder fitun rua ne'e akresenta, maske parte rua intende ona, maibé polítiku sira mak komplika tiha.

"Agora polítiku sira mai komplika tiha, entaun ema sira ne'e mai atu halo saida, la hatene tiha, dalaruma ita deskonfia katak, Amérika mai halo Aeroportu ne'e, keta halo ba sai fali na'in, eipah Timor la sai na'in ona, Amérika mak sai fali na'in?," nia tenik.

Ho situasaun ne'e, Lere Anan Timur husu ba Governu, atu haree didi'ak.


"Polítiku sira, liu-liu Governu, MNEK atu haree didi'ak, tanbá ida ne'e bazeia ba ita-nia kooperasaun tékniku militár, ne'ebé atu ba Aeroportu militár ka sivíl ne'e Governu mak deside," katak Lere.

Alende ne'e, Lere mós husu ba Amerikanu sira, atu kompriende Governu Timor-Leste no Estadus Unidus Amérika (EUA).

Lere Anan Timur mós akresenta, akordu formál ba rehabilitasaun Aeroportu ne'e seidauk iha, maibé akordu mak bazeia ba kooperasaun tékniku militár nian, hanesan Amérika sira mai halo klínika, eskola, maibé Governu halo komplikasaun ba sasan hirak ne'e, hodi sai problema, tanba antes ne'e, Amérika investe uluk ona tokon $.10.

Iha Parte seluk A. da Costa, estudante relasaun Internasional iha Universitariu ida iha Dili, duvidas ho apoiu husi EUA nune'e husu governu nafatin ho politika rekasaun externa ne'ebe iha.

"ha'u hanoin ita presiza kestiona Amerika ninia hakarak atu apoiu hadi'a aeroportu Baukau. Keta halo sira iha hakarak seluk tan ba ita hare sira hahu monta baze iha Darwin. Nune'e duni di'ak liu governu Timor Leste foti osan husi fundu Minarai, investe rasik osan dez miloeins ba reabilita Aeroportu ne'e se Amerika hakarak apoiu ita mais ho de'it Dez miloeins entaun lalika simu," dehan da Costa ba Tempotimor.com (9/10) iha universidade ne'ebe nia estuda ba, iha Dili. (*)

 

PUBLISIDADE

Rate this item
(2 votes)
Last modified on Saturday, 10 October 2020 08:46
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« November 2020 »
Mon Tue Wed Thu Fri Sat Sun
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Tempo Timor Networks