Print this page

Debate OJE 2020, Hahu ho 'Drama' Remata ho Aprovasaun

By October 09, 2020 3399
Plenaria Parlamentu Nasional Plenaria Parlamentu Nasional Foto Suplai

Tempotimor (Dili) - Reprezentante povu konklui ona debate Orsamentu Jerál Estadu (OJE), tinan 2020 ho karakter urjensia iha Parlamentu Nasionál, desde inisiu debate mosu 'drama' politika entre bankada governu no opozisaun no remata ho aprovasaun.

Parlamentu Nasionál (PN), la'os de'it fatin atu halo fiskalizasaun, maibé mos sai fatin 'drama' politika, situasaun ne'e mosu enkuantu PN halo debate Orsamentu Jerál Estadu 2020, retorika politika, kritikas no sujestaun mosu entre bankada governu no opozisaun.

Observasaun simples bainhira bankada opozisaun CNRT hahu loke debate, ho kedas akuzasaun VIII governu ne'ebé lidera husi Primeiru ministru Taur Matan Ruak nu'udar PM de faktu no hadau poder.

Mesmu nune'e, parte bankada governu mos halo defeza hodi hatete, akuzasaun ne'ebé mai husi CNRT hanesan deklarasaun politika no laiha fundamentu no tribunal mak deside tuir Konstituisaun katak, VIII governu de faktu ou lae.

Maibé governu liu-husi Primeiru Ministru, Taur Matan Ruak, laiha resposta ba akuzasaun sira husi deputadu sira, maibé eis Jeneral fitun rua ne'e husu ba deputadu sira iha Parlamentu Nasionál, atu aprova proposta Orsamentu Jerál Estadu 2020.

PM Taur fo razaun atu aprova proposta Orsamentu Jerál Estadu ba tinan 2020 nian, tanba durante Fulan Janeiru to'o Outubru Estadu Timor-leste moris de'it, ho Dotasaun Orsamentu Temporáriu (DOT).

"Ami halo aprezentasaun ida-ne’e iha sirkunstánsia sira ne’ebé exesionál tebes, bainhira pasa fulan sanulu ho ezekusaun orsamentál iha rejime duodésimu, durante períodu ne’ebé ita hasoru teste ida, nu’udar povu no hanesan Nasaun Soberana, ne’ebé unida no independente", dehan Taur.

Entertantu husi observasaun www.tempotimor.com durante debate OJE 2020, votasaun iha jenerálidade pasa ho votu afavor 44 husi bankda 7 hanesan Fretilin,PLP, PD, Khunto, PUDD no UDT/ Frenti-Mudansa, bankada CNRT vota abstensaun 21 no Kontra 0 ne'ebé hala'o iha loron Sesta (2/10).

Bainhira hakat ba debate espesialidade, ne'ebé hala'o iha loron Segunda (5/10) kritika inklui intervensaun husi bankada no deputadu sira kontinua, bainhira kada membru governu sira aprejenta despeza orsamentu tinan 2020.

Mosu mos ezejensia husi Deputadu sira, relasiona ho polimika projeitu 143 emergensia, ne'ebé hela 44 projeitu governu seidauk selu iha momentu bainhira Ministeiru Obras Publika, Salvador Pires aprezenta Orsamentu.

Publiku sira mos akompaña no foin hatene, bainhira Primeiru Ministru Taur Matan Ruak inklui deputadu Bankada PD, Adriano Nascimento, lekar sai katak sei iha tan projeitu emergensia seluk ne'ebé besik 500 iha governu anterior ne'ebé laiha kontratu.

Mesmu nune'e, Orsamentu Jerál Estadu tinan 2020, nafatin pasa ho total montante $1.496.1 milloens, mesmu iha mudansa balun hanesan parte Ministeiru Koordenador asuntu ekonomiku ne'ebé re-aloka 23 milloens ba fundu Covid-19, bainhira Primeiru Ministru, Taur Matan Ruak rasik mak haruka komisaun C halo mudansa, nune'e deputadu proponentes sira hatama proposta no passa iha votasaun espesiálidade.

Nune'e ohin, reprezentante povu iha uma fukun Parlamentu Nasionál konklui no halo aprovasaun final global ho votu 43 aprovadu, kontra 23 no abstensaun 1, no tuir Prezidenti parlamentu nasional Aniceto Guterres hatete,  Sesta (9/10) sei submete ba Prezidenti Repúblika Francisco Guterres Lu Olo hodi foti desizaun. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items