Tempotimor (Díli)- Primeiru-Ministru (PM), Taur Matan Ruak kontente no agradese ba bankada partidu Kongresu Nasionál Rekonstrusaun Timor (CNRT), ne'ebé hiit kartaun mean, ba Orsamentu Jerál Estadu (OJE) tinan 2020 nian, iha Parlamentu Nasionál.

"Ha'u kontente loos, tanba finalmente Orsamentu Jerál Estadu (OJE) 2020, pasa iha finál globál, iha Parlamentu Nasionál, nune'e ha'u hakarak lori VIII Governu nia naran, agradese ba Prezidente Parlamentu Nasionál, meza Parlamentu Nasionál nian no distintus deputadu ho distintas deputada tomak i espesiál ba bankada apoiu Governu, mas também ha'u mos hakarak lori VIII Governu nia naran, hato'o saudasaun espesiál ba partidu opozisaun, ne'ebé durante fó kontribuisaun di'ak loos", PM Taur agradese, hafoin aprova OJE tinan 2020, iha Parlamentu Nasionál, kinta (08/10).

Taur Matan Ruak mos relata, distintu deputadu sira, hato'o sira-nia preokupasaun barak, nune'e Governu rezista hela, hanesan kapasitasaun ida ba Governu, atu kontinua hadi'a, husi tempu ba tempu.

"Ami rejista sira-nia preokupasaun barak i ami espera tempu ba tempu kontinua hadi'a nafatin, para que kapasita Governu fó prestasaun servisu ida di'ak, ba ita-nia sidadaun sira," dehan PM

Xefe Governu ne'e akresenta, iha OJE tinan 2020 nian ne'e, Governu sei halo servisu maka'as, hodi implementa programa prioridade, ne'ebé tuir planu, atu rekupera ekonomia, iha rai laran.

"Programa ida boot, prioritáriu liu mak, planu rekuperasaun ekonómika ho valór 113 ital milloes de dolares, ne'ebé sei ba diresaun ita-nia populasaun sira, em jerál i ba emprezáriu sira, traballadór formál nomos naun-formál, entaun Governu sei servisu maka'as loos, para que implementa programa ida ne'e, kurtu prazu fulan rua nia laran, tanbá nia kontinuasaun sei mai, iha orsamentu 2021," Taur relata. (*)