Maske CNRT vota kontra, Aniceto afirma, durante ne'e opozisaun sira sempre partisipa, iha diskusaun OJE, maski krítika, fó opiniaun, protesta oi-oin, maibé buat hirak ne'e hotu, to'o ikus lori PN konsege aprova OJE ida ne'e.
"Ami mos rekoñese partisipasaun husi destintu deputadu sira, liu-liu kolega sira deputadus husi opozisaun, ne'ebé ita rekoñese ativamente no kontribui opiniaun perguntas, krítikas i halo Parlamentu Nasionál konsege duni aprova OJE 2020," Dehan Aniceto, hafoin finaliza diskusaun no aprovasaun finál globál, ba OJE 2020, iha Plenariu PN, kinta (8/10).
Kona-bá aprovasuan OJE, iha finál globál ne'e, PPN haktuir, ida ne'e tuir kalendáriu komisaun C, sei prepara redasaun finál, iha loron 9 aban, nune'e haruka kedas diploma refere ba Prezidente Repúblika, hodi Promulga.
"Wainhira hetan ona promulgasaun husi Xefe Estadu, hein katak Governu sei ezekuta didi'ak, ita hatene katak tempu la barak, nível ezekusaun ne'e kiik, maibé importante liu mak, kualidade de ezekusaun," dehan nia.
Molok ne'e , Vise-Prezidente Bankada CNRT Patrocínio Fernandes deklara, durante ne'e Bankada CNRT nia pozisaun, fó votus abstensaun no kontra, tanbá CNRT haree katak, husi aprezentasaun OJE 2020 ne'e, viola konstituisaun.
Tanbá ne'e, bankada CNRT reafirma nia pozisaun loloos, atu defende konstituisaun RDTL, atu Estadu bele hakruk no obedese ba konstituisaun, nu'udár ai-rin ba konstrusaun Estadu Timor-Leste.
"Kada CNRT konsidera VIII Governu de faktu no Parlamentu Nasionál V lejislatura ne'e, kaduka tiha ona, tuir artigu 86, E) husi konstituisaun RDTL," dehan nia.