Iha Loron 17 Janeiru 2020, ho fiar a’an CNRT Xumba OJE maibe iha loron 8 Oetobru 2020, hafoin aprovasaun ba Orsamentu Jerál Estadu (OJE) ba tinan 2020 nian iha Parlamentu Nasionál, Deputada husi bankada CNRT, Bendita Magno hatudu hirus no konsidera Primeiru Ministru Taur Matan Ruak maupagador ba partidu CNRT.
"Hau hakarak hato'o ami nia deklarasaun de votus kontra, atu hato'o ba povu tomak katak, ita mai nafatin ho programa ne'ebé CNRT nia obra mos iha neebá, ne'e mak governu daualu ohin loron mai prezensa iha ne'e, segundu labele haluhan Primeiru Ministru tur iha neebá, CNRT mak fo ba sai hanesan Primeiru Ministru, ida ne'e labele nega no sai maupagador ba iha CNRT rasik",dehan Bendita iha sesaun halo deklarasaun ba votus OJE tinan 2020 nian, iha plenaria Parlamentu Nasionál, kinta (08/10).
Nia tarata, Taur Matan Ruak, dehan, CNRT mak uluk hili nia hodi asumi kargu Prezidente Repúblika, no ohin asumi tan kargu hanesan Primeiru Ministru.
"Ita mos tenke hanoin, kuandu oitavu governu lori programa mai, Fretilín ohin loron mai viabiliza, maibé Fretilín vota kontra ba programa oitavu governu ninian, ida ne'e mak hau hakarak hato'o, dala ida tan, labele sai maupagador ba iha CNRT rasik hili tiha ba Prezidente mai to'o iha Primeiru Ministru", Nia akresenta
Iha fatin hanesan, Deputadu husi bankada Fretilín, David Dias Ximenes 'Mandati' lamenta tebes ho lia-fuan maupagador ne'ebé deputada CNRT, Bendita Magno hasai ba Primeiru Ministru Taur Matan Ruak.
"Ohin loron haree ba ita nia matan laran, hodi dehan maupagador, serake ita nia lider sira merese lia-fuan insultu sira ne'e! Ita ko'alia kona-ba politika hau konkorda, maibé lia-fuan insultor talves laiha kabimentu",Nia hato'o ho tristi
Mandati argumenta, karik laiha sira hodi hala'o prosesu luta, dalaruma naran ida Timor-leste ne'e mos la akontese.
"Halo politika ba, maibé hanoin hikas ba, labele nega sira, hodi dehan ukun an ne'e lori pregu ho suratahan, loos duni pregu ho suratahan, maibé antes to'o iha pregu ho suratahan ne'e, prosesu naruk tebes, lori ema barak ninia terus, balun halai iha ai-laran hanesan balada fuik",dehan Mandati. (*)
