Ligadu ho kestaun deputadu sira levanta kona projeitu inkluidu eletrisidade sira ne'ebé la selu, Guvernante ne'e hatete, uluk programa eletrisaun nasional iha dekretu lei ida númeru 44/2012 ne'ebé ajudikasaun ba kompaña lokal sira, maibé depois VI guvernu 2016 iha fali dekretu lei numeru 41 ne'ebé mak revoga fali dekretu lei numeru 44, iha momentu ne'ebá projeitu ne'e hala'o molok halo kontratu, maibé dekretu lei ida ne'e regovadu tiha .

"Ita boot sira haree lei jestaun finanseira númeru 13/2009 data 21 Outubru iha númeru 6 alina 23 hatete, guvernu so orsamenta ba kompremisiu sira ne'ebé tama ona ba terseira parte, iha ne'e hau difikuldade oituan atu bazeia ba lei orsamenta atu selu ba projeitu sira ne'ebé mak laiha kontratu," dehan Salvador bainhira hatan ba intervensaun deputadu sira iha Parlamentu nasional, Kuarta (07/10).

Ministru Salvador argumenta, relasiona ho projeitu 143, iha projeitu 44 mak seidauk selu, tanba laiha baze legal, maibé bainhira iha kontratu husi projeitu hirak ne'e, nia parte prontu selu, tanba konsidera emprejariu iha direitu hetan osan.

"Ita hatene, se iha kontratu baze legal par selu, ema nia osan ita tenki selu, maibé ba kazu ida ne'e ita laiha," dehan Salvador.

Nune'e, Salvador esplika bainhira VIII guvernu hahu nia mandatu, projetu 143 emergensia, no nia parte tenta atu rezolve i husu duni ba tekniku sira, inklui iha fundu infraestrutura, tanba ne'e kona-ba nia fundamentasaun tribunal das kontas fo rekomendasaun, atu tuir lei aprovizonamentu artigu númeru 92 i 94, ne'ebé hatete promove projeitu emergensia sira, kuandu situasaun sira aposta risku siguransa i saúde públiku ameasadu ba povu.

"Ne'e ita bele promove, infelizmente ami lahetan ida ne'e," dehan Salvador.

Mesmu nune'e, ministru inklui Vise-ministru obras publika hamutuk ho Prezidenti Kafi, husu mos pareser legal husi Ministeiru publiku, oinsa atu avansa fo solusaun ba 44 (projeitu) ne'ebé laiha kontratu.

Primeiru ministru Taur Matan Ruak mos aproveita oportunidade, apelu ba guvernu, la'os 143 projeitu de'it mak iha polimika maibé sei iha tan projeitu seluk ne'ebé laiha kontratu.

Xefi guvernu husu Parlamentu Nasionál atu koopera ho guvernu, hodi buka solusaun mesmu prosesu ne'e todan, maibé sei la husik let de'it.

"Ami hatene, ita nia projeitu la'os de'it 143, sei iha tan i ami presija ita boot sira nia koperasaun par bele hadi'a ka problema ida ne'e, tanba ida ne'e la'os kaman ba guvernu rasik mas também ami mos lakohi soe hela ida ne'e, mais ami presija apoiu," dehan Taur.

Iha fatin hanesan, deputadu bankada CNRT, Domingos Carvalho hateten, dadaun tau osan ba halo projeitu foun, selu dividas no projeitu sira ne'ebé hotu ona, maibé la selu inklui projeitu sira ne'ebé too agora la selu, tanba laiha kontratu i balun iha kontratu mos la selu.

Tanba ne'e, husu bainhira pessoal se mak haruka halo projeitu emergensia 143 no inklui kompaña, bainhira sala lori ba tribunal, maibé nia parte husu atu guvernu halakan ahi eletrisidade ne'ebé finaliza ona iha tinan tolu ba kotuk, hanesan iha Munisípiu Kovalima, Postu admistrativu Fohorem.

"Problema saida de'it, ema ida haruka ne'e mak sala lori nia ba tribunal, konpana ne'e mak sala lori nia ba tribunal, maibé ahi ne'ebé mak hotu favor ida loke ba Komunidade," dehan Domingos.

Nune'e mos deputadu bankada PD, Adriano hatete, problema nia hun ne'e bainhira Komisaun inkeretu parlamentu, ne'ebé hari husi Parlamentu Nasionál bazeia ba rekomendasaun Primeiru Ministru, Taur Matan Ruak la aprova relatóriu iha plenária Parlamentu nasional tempu neebá.

Adriano mos salienta, la'os de'it 143 projeitu, maibé sei iha projeitu seluk hamutuk 500 ne'ebé laiha kontratu inklui eletrisidade Suai Fohorem.

Enkuantu Iha sorin seluk, deputadu bankada Khunto, Luis Roberto, apresia ho esforsu VIII guvernu, tanba servisu ho loloos bazeia ba lei, bainhira projeitu ne'ebé laiha kontratu, tenki haree didiak bazeia lei, maibé bainhira projeitu mak iha kontratu guvernu iha dever moral tenki selu.

"Hau hakarak apresia ba VIII guvernu ida ne'e, tanba servisu ho loloos bazeia ba lei," dehan Luis.(*)