Deputada Ana Belo iha ninia intervensaun durante diskusaun espesialidade ba orsamentu jeral estadu (OJE) 2020 ne’ebé aloka ba Ministériu Negosiu Estranjeiru no Kooperasaun (MNEK) kestiona osan ba embaixada TL iha Luanda.
Ana Belo husu, tanba sa mak husi montante orsamentu millaun $20.746 ne’ebé aloka ba MNEK, aloka de’it rihun $1 ba embaixada TL iha Luanda.
"Iha Luanda ne'e $1 mill de'it? Ha'u la hatene, membru do governu, mill ne'e ita atu halo saida? Pelumenus iha esplikasaun, tanba ba Luanda ne'e $1 mill dollars," dehan Ana Belo iha PN, Tersa (06/10).
Tanba osan ne’ebé kiik, deputada ne’e sujere atu di’ak liu taka tiha embaixada TL iha Luanda bainhira sente la impportante.
“Se ita sente iha Luanda la presiza harii embaixada nusa la taka tiha de'it duke husik hela iha ne’eba, depois tenke selu uma aluga, no fó staff lokál ninian, ho buat sira seluk. Ha'u hanoin se ita-boot sira sente katak la presiza, mellor ita taka, lalika hasai tan kustu," dehan nia.
Hatan ba kestaun ne’e, Ministra Negósiu Estranjeiru no Kooperasaun (MNEK), Adlajiza Magno hatete, osan ne'ebé aloka ba Luanda ho montante rihun $1 uza hodi selu fali arendamentu iha Guinea-bisaun tanba embixada TL iha Luanda taka tiha ona.
"Luanda iha mill ne'e tanba ita ninia embaixada iha Luanda taka tiha ona, purtantu iha hela osan $1 mill iha ne'e hodi uza ba ita-nia Ajensia Kooperasaun Timor-Leste nian atu uza selu arendamentu iha Guinea-Bissau," dehan nia.