Angelina hatete, liga ho Orsamentu Jeral Estadu (OJE) 2020, ho montante $.70, milloes ne'ebe sei aloka ba MEJD, tenke halo polítika ida di'ak hodi bele rezolve fila-fali kontratu profesores na'in 273 nian ne'ebé sira demite.

Tuir nia, investimentu boot sira ne'ebe durante MEJD halo, uza ema hirak ne'e mak serbisu, tanba iha funsionáriu balun servisu durante tinan 6 ona, balu to'o 10, maibe profesór sira ne'e nafatin hala'o servisu ho kondisaun ida kontratadu no temporáriu.

"Husi Ita-boot nia polítika rasik ba ema sira na'in 273 ne'e Miinisteriu Edukasaun iha ona polítika ruma ba ida ne'e, ka lae,", hatete Deputada bankada PLP, Maria Angelina Sarmento, liuhosi intervensaun iha debate ba faze espesialidade OJE 2020 iha plenária PN, tersa (6/10).

Nia akresenta, kauza ne'ebe MEJD halo ba funsionáriu sira maka, kada tinan sempre extende hela de'it sira nia kontratu maibé kondisaun traballu ho natureza ida kontratadu, nafatin sai pior liu tan hodi ikus mai rezultadu hapara sira husi servisu.

Nia husu ba MEJD atu nafatin haree hodi rezolve problema refere, tanba funsionáriu hirak ne'e sai vitima tebe-tebes husi MEJD nia politika ho predisizór sira iha ministériu laran.

Hatán ba kestaun ne'e, Ministru Edukasaun Juventude no Desportu (MEJD), Armindo Maia, rekoñese problema refere, foin dadaun nia parte halo ona reuniaun ida ho profesores na'in 273 refere, hodi rona sira nia lamentasaun.

Maske nune'e, tuir Armindo, problema refere nia parte seidauk bele foti desizaun finál ruma, tanba presiza halo ezersísiu lubuk ida hodi bele solusiona.

"Kona-ba sira na'in 273, ne'ebé ha'u nia predisizór sira foti desizaun, ida ne'e ha'u iha reuniaun dala ida ona ho sira, ho sira ninia reprezentante, sira esplika problema sira ne'e, ha'u mós hatete katak prontu, ami labele foti lai desizaun, estuda lai sira nia problema ne'e lai, ", informa nia.