Nunee, kazu sira ne'ebé kontinua rejísta ho númeru aas iha Komando Municipiu Dili (KMD), kompostu husi kazu violénsia doméstika no ofensas integridade fízika aas.

Tuir segundu Komandante PNTL Munisípiu Dili, Superentendente Asistente PNTL, Euclides Belo informa, kazu iha Munisípiu Dili ne'ebé númeru aas liu mak kríme ofensas fízika no violénsia doméstika.

"Númeru kríme ne'ebé akontese iha Dili ne'e, kazu agresaun fíziku mak aas teb-tebes. Tanba ne'e mak ami sensibiliza ona, maibé presiza halo edukasaun di'ak liutan ba ita-nia komunidade, liu-liu ba sira ne'ebé sempre komete kríme," dehan Segundu Komandante PNTL Munisípiu Dili, Superentendente Asistente PNTL, Euclides Belo iha nia kna'ar fatin, Kaikoli, Tersa (6/10).

Nia akresenta, Ofensas integridade iha Díli, iha fulan Jullu tejísta hamutuk kazu 42, iha fulan Agostu iha kazu 55 no iha fulan Setembru iha 54 kazu. Nune'e totál kazu iha krime ofensas fízika ne'ebé PNTL munisípiu Díli rejísta hamutuk 151.

Euclides afirma, la'ós kazu agresaun fíziku de'it, maibé iha mós kazu violénsia doméstika ne'ebé ho númeru boot tuir fali kríme ofensas.

"Tuir avaliasaun, violénsia doméstika mós tama iha segundu lugár, tanba ne'e mak PNTL kontinua halo koordenasaun ho autoridade lokál, entaun liuhosi programa Polísia ba uma ne'e, bele esplika ba sira katak, violénsia doméstika ne'e kríme", dehan nia.

Nia fó ezemplu, uluk bainhira akontese problema iha uma-laran, ema dehan bikan ho kanuru mak tarutu, maibé la konsiénte katak ida ne'e halo parte ona ba kríme.

Entretantu, kona-ba kazu númeru rekapitulasaun nian PNTL seidauk bele publika, maibé bazeia ba análiza no dadus ne'ebé iha katak, violénsia doméstika mak sai problema númeru daruak iha Munisípiu Dili.

Komandante ne'e afirma, kazu sira ne'ebé mosu, PNTL sempre prosesa ba Ministériu Públiku (MP).

"Kazu la pendente iha komandu PNTL Munisípiu Dili, maibé ami sempre enkamiña ba Ministériu Públiku (MP) Tribunál Rekursu (TR) no tribunal distritál, tanba ami iha komunikasaun ho sira," dehan Euclides.(*)