Tanbá tuir Deputada Elvina Sousa katak, diskusaun OJE hanesan momentu ida ne'ebé esensiál tebes, atu Ministru Finansas bele marka prezensa, maibé realidade Ministru la partisipa iha diskusaun refere. Tanbá ne'e, deputada Elvina husu PM esplika klaru ba públiku, razaun husi MF nia Auziénsia ne'e.
"Ha'u atu husu klarifikasaun de'it ba Suá-Exselénsia Primeiru Ministru kona-bá prezensa husi señor Ministru Finansas la marka prezensa, tanbá Orsamentu Jerál Estadu ne'e eventu ida que mais importante, povu no deputadu sira mos hakarak hatene. Tanbá sá la mai iha eventu ida que mais importante", dehan Elvina, iha Plenária durante diskusaun Orsamentu Jerál Estadu (OJE) tinan 2020, faze espesiálidade, iha Parlamentu Nasionál, segunda (05/10/).
Hatan ba kestaun ne'e, Xefe Governu, Taur Matan Ruak klarifika, Ministru Finansas (MF), Fernando Hanjam la marka prezensa, iha diskusaun Orsamentu Jerál Estadu (OJE) tinan 2020 nian, iha Parlamentu Nasionál, tanba nia kondisaun saúde la permite ka moras, nune'e Primeiru Ministru rasik haruka atu Ministru Finansas labele partisipa iha diskusaun refere, hodi nune'e, bele rekupera lalais nia saúde.
"Ha'u hakarak esklarese relasiona ho deputada ne'ebé husu kona-bá señor. Ministru Finansas nian, é verdade nia saúde la diak, i ha'u mak despensa nia para labele mai, atu rekupera nia saúde", dehan PM Taur, durante diskusaun OJE tinan 2020, faze espesialidade, iha Parlamentu Nasionál, segunda (05/10).
Entretantu, durante diskusaun Orsamentu Jerál Estadu (OJE) tinan 2020 nian, temporariamente Vise-Ministra Finansas, Sara Lobo Brites mak mantein iha plenaria, hodi fó esplikasaun no hatan ba deputadu sira nia preokupasaun, relasiona ho aprezentasaun OJE tinan 2020 iha PN.
Enkuantu Ministru Finansas Fernando Hanjam la marka prezensa iha PN, hahú kedas iha faze jeneralidade, diskusaun OJE tinan 2020, to'o faze espesialidade nian.